Nobeli në Kimi shkon për krijuesit e mjetit për ndërtimin e molekulave që ndihmojnë në prodhimin e ilaçeve
Nga OraNews Përditësimi i fundit 6 Tetor 2021, 13:13
Benjamin List me origjinë gjermane dhe David MacMillan me origjinë skoceze fituan çmimin Nobel në Kimi, për zhvillimin e mjeteve të reja për ndërtimin e molekulave që kanë ndihmuar në prodhimin e ilaçeve të reja dhe që janë më miqësore me mjedisin.
Dy shkencëtarët u nderuan me çmimin për studimin e tyre mbi zhvillimin e organokatalizës asimetrike.
"Katalizatorët organikë mund të përdoren për të nxitur shumë reaksione kimike," tha Akademia Mbretërore Suedeze e Shkencave në një deklaratë.
"Duke përdorur këto reagime, studiuesit tani mund të ndërtojnë në mënyrë më efikase çdo gjë nga ilaçet e reja deri tek molekulat që mund të kapin dritën në qelizat diellore."
Ditën e djeshme fituan çmimn Nobel për Fizikë tre shkencëtarët, Syukuro Manabe, Klaus Hasselmann dhe Giorgio Parisi.
Të hënën, Komiteti Nobel u dha çmimin në fiziologji ose mjekësi amerikanëve David Julius dhe Ardem Patapoutian për zbulimet e tyre se si trupi i njeriut e percepton temperaturën dhe prekjen.
Gjatë ditëve të ardhshme çmimet do të jepen gjithashtu për punën e shquar në fushat , letërsisë, paqes dhe ekonomisë.
