Tirana, kryeqyteti i zhurmës, ndotje e lartë akustike edhe gjatë vitit të pandemisë
Nga OraNews Përditësimi i fundit 24 Gusht 2021, 17:27
Në pothuajse të gjithë Tiranën, niveli i ndotjes akustike është tej normave të lejuara. Kjo është evidentuar edhe gjatë 2020-ës, i cili supozohej të ishte një vit i qetë për shkak të pandemisë. "Partizani i Panjohur" dhe stadiumi "Dinamo", janë zonat me nivelin më të lartë të ndotjes akustike.
Zhurmat janë kthyer në një problem serioz për qytetarët e Tiranës, të cilët përballen çdo ditë me këtë situatë.
Në fakt, sipas raportit të Ministrisë së Mjedisit për gjendjen në vitin 2020 rezulton se qetësia ka munguar edhe në vitin e pandemisë.
Monitorimi i kryer në 15 pika ka konstatuar se në kryeqytet ka tejkalim të normës së zhurmës gjatë ditës deri në 26.8%.
Kjo situatë problematike paraqitet për banorët tek "Partizani i Panjohur", ndjekur më pas nga zona e stadiumit "Dinamo" ku niveli i ndotjes akustike arrin në 24.7%.
Shqetësuese mbeten edhe zhurmat e larta në zonën e sheshit "Skënderbeu".
Por qetësia kryeqytetasve ka munguar edhe gjatë natës, ndonëse nga pandemia për disa kohë lëvizjet ishin shumë të kufizuara.
Zona e Laprakës ka regjistruar kulmin në këtë periudhë, duke tejkaluar normën me 34%.
Vlera të larta të zhurmave arrihen dhe në disa zona të tjera të Tiranës, që janë mbi normën e lejuar, por më të ulëta se ato që mund të cilësohen zona të kuqe.
