Kokaina në Durrës, Çuçi: Kjo është një luftë e vazhdueshme që nuk përfundon me një operacion
Nga OraNews Përditësimi i fundit 13 Korrik 2021, 19:54
Ministri i Brendshëm, Bledi Çuçi ka reaguar në lidhje me 11 kg kokainë të kapur në portin e Durrësit. Çuçi shprehet se kjo është dëshmi e luftës pa kompromis kundër krimit të organizuar. Ministri është shprehur se kjo është një luftë e vazhdueshme, që nuk nis e as përfundon me një operacion.
"Faktet flasin vetë. Pas operacionit të sotëm shkon në rreth 1 ton sasia e lëndës narkotike e llojit kokainë e kapur në Portin e Durrësit gjatë katër muajve të fundit. Asgjë nuk është e rastësishme, por dëshmi e luftës pa kompromis kundër krimit të organizuar dhe e aftësisë zbuluese e goditëse të Policisë së Shtetit.
Këto operacione dëshmojnë gjithashtu besimin e lartë të partnerëve tanë ndërkombëtarë në hetimet e përbashkëta, intensive dhe profesioanle, në goditjen e rrjeteve të trafikut të drogës. Kjo është një luftë e vazhdueshme, që nuk nis e as përfundon me një operacion. Ne do të vijojmë punën me Policinë e Shtetit dhe të gjitha agjencitë e tjera ligjzbatuese, brenda e jashtë vendit, për ta bërë Shqipërinë një vend më të sigurt," shprehet Çuçi.
