ISHTI sqaron shpërthimin në Velipojë: Një bombol kampingu kishte rrjedhje, gabim njerëzor

Nga Anxhela Celibashi, Bepin Kolvata Përditësimi i fundit 5 Korrik 2021, 15:19

Shpërthimi i bombolës së gazit në një hotel në Velipojë të mëngjesin e së dielës, ngjarje ku mbetën të plagosur 4 anëtarë të familjes Gjoka ka si shkak një gabim njerëzor.

Ky është përfundimi në të cilin kanë dalë ekspertët e Inspektorati Shtetëror Teknik dhe Industrial pas hetimit të rastit që rrezikoi të shkaktojë një tragjedi.

“Shpërthimi dhe zjarri dyshohet të ketë ndodhur nga rrjedhja e gazit nga një nga bombolat e kampingut e cila mund të jetë lënë e hapur gjatë natës si pasojë e një gabimi njerëzor. Sasia e gazit të rrjedhur dhe hermeticiteti i ambientit ka krijuar kushte për shpërthim dhe zjarr në prezencë të faktorëve të jashtëm si ndezja e dritave në këtë ambient ose përdorimi i burimeve të tjera të zjarrit nga pakujdesi njerëzore.”

Ngjarja në hotelin  e familjes Gjoka në Velipojë u shkaktua nga një bombol kampingu.  Drejtori i shërbimit zjarrfikës në Shkodër, Agron Dibra duke i konsideruar “kancer”, këshillon kujdes të veçantë në përdorimin e tyre.

"Pavarësisht apeleve qe kam bere ato bombola janë jashtëzakonisht të rrezikshme sidomos në Velipojë që qëndrojnë me nga 10 muaj pa u përdorur dhe më pas krijojnë rrjedhje. Bombolat e kampingut janë gangrena me e madhe qe kemi sepse nuk duhen përdorur gjithmonë," tha ai.

Prej paradites së të dielës, Alketa Gjoka bashkë me fëmijët e saj, 19, 15 dhe 12 vjec, janë në luftë për jetën dhe po trajtohen në repartin e diegie plastikës në QSUT.

 Nëna e 40 vjeçares, tregon për gjendjen e tyre dhe shkakun e prag tragjedisë.

"Na thanë që kemi dhimbje të trupit. Vajza ishte duke  bërë kafen, sa e mori shkrepësen e ndezi ka marrë flakë aty. Fëmijët ishin në gjumë, kur ka shkruar flaka te shtrati janë çuar. Nuk e di, i ka në dorë doktori dhe Zoti," tha ajo.

Na magazinën e hotelit të familjes Gjoka  u gjetën edhe 6 bombola të tjera 3-5 litra të cilat u jepeshin turistëve.

Gjithashtu objekti ka edhe një çisternë 1 mijë litërshe që fatmirësisht ishte e boshatisur.