"Donte ta bënte krenare të ëmën", Ora News në shkollën e Musaen Zenelit, mësueset të tronditura nga vrasja e tij
Nga OraNews Përditësimi i fundit 29 Qershor 2021, 11:16
Një ditë pasi u përcoll në banesën e fundit, Ora News ishte sot në shkollën e mesme profesionale "Hamdi Bushati", ku 19-vjeçari Musaen Zeneli ndoqi katër vitet e gjimnazit.
Mësueset tregojnë se ai ishte nxënës shembullor dhe e kishte pasion të madh kuzhinën.
Lajmin e kobshëm për vrasjen e tij thonë se e morën vesh nga rrjetet sociale dhe ende e kanë të pamundur ta besojnë.
"Njohjet me Musaenin i kam që në fëmijërinë e tij. E kam takuar kur i ndodhi fatkeqësia e të atit. Ishte fëmijë i dashur dhe i mirë. Kur u rrit erdhi në shkollën tonë. Duke pasur njohje me mua sikur gjeti një lloj ngrohtësi dhe kishte dëshirë të më takonte. Në vit të parë i dhashë mësim dhe përpiqej dhe kishte dëshirën të mësojë.
Duke pas këtë njohje përpiqesha që të lënda ime të jepte diçka më shumë që të flisja mirë për të te ëma Anila me të cilën kishte lidhje shumë të ngushtë dhe donta ta bënte krenare. Vitet kaluan dhe ai u bë maturant, gjithmonë me dëshirën e madhe për tu bërë kuzhinier.
Këtë profesion e donte shumë.Shpesh vinte te mësuesja e angazhuar me praktikat në biznes për ti siguruar një vend në biznes, ai ka bërë praktikën te Iliria, 1-2 vjet dhe nga kontaktet që kam pasur me kuzhinierin më ka folur fjalë shumë të mira. Mbrëmjen e maturës të gjithë maturantët ndryshojnë dhe thua a është kjo vajzë apo ky djalë.Duken më të bukur. Musaeni shkëlqente atë natë, mori shumë komplimente.
Unë dhe mësuesja kujdestare kishim një vëmendje të madhe atë natë tek ai. Ishte i lumtur, gëzoi e kërceu, fotografoi pa fund atë mbrëmje mature. E përcollëm në shtëpi. Kur mora vesh lajmin që shoi endrrat dhe dëshirat e tij, u shokova. Pashe lajmin në facebook dhe nuk u besova syve" tregon një nga mësueset e tij.
"Ishte një djalë i sinqertë, i rritur me një prind. I ati e la shumë të vogël jetim, i preu krahët jo vetëm nënës së tij por edhe djalit dhe kjo ishte e dukshme në sytë e tij. Ai më tej kërkonte të socializohet me mësuesit, shikonte prindin. Më bëri përshtypje një status i një kolegu ku thoshte "Musaen ne të vramë duke të edukuar me ndershmërinë e punës dhe jetës" tregon një tjetër.
Si një nxënës dhe fëmijë shembullor e kujton edhe mësuesja kujdestare, e cila ka pasur raporte edhe më të afërta me të.
"Musaeni që në ditët e para, para se të niste shkolla u njoh me mua. Me ndihmoi të vendos këndin e ri të klases dhe të bënim rregullimet. Fëmijë i dashur dhe punëtor. Kishte pasion kuzhinën. Fëmijë i dashur e sinqertë, i dëgjueshëm dhe komunikueshëm. Fjalët e tij ishin urdhëro dhe më fal, sa herë komunikonte.
Që në vitin e parë ai shfaqi emocionet për punën që të fitojë aftësi për profesionin e kuzhinierit. Ishte i perkushtuar dhe kudo ku ka bërë praktikë na flisnin fjalët më të mira. Mbrëmja e maturës, ka qenë e paharrueshme, që do të mbetet gjatë në kujtesën tonë.
Ka patur vëmendje të veçantë për ne. Ka kërcyer e kënduar pa fund. Lajmin e mora nga një kolege. Por duke qenë se lajmi ishte me emër tjetër, besuam se do ishte dikush tjetër.
Gjithë kohën kam thënë ishalla nuk është ai që kam pas në klasë. Por fatkeqësisht e mora vesh se ishte Musaeni i klasës time. Gjithë dita më ka kalua duke menduar sidomos natën e maturës, ai gëzim dhe hare që shfaqi me mësueset dhe moshatarët e tij".
Musaen Zeneli ishte mes katër viktimave pas përplasjes me armë në Velipojë për ndarjen e parcelave të plazhit.
Ai gjeti vdekjen në mbyllje të ditës së tij të parë të punës si kamarier në hotelin e Gocajve.
