Trafik kanabisi përmes liqenit të Ohrit drejt Maqedonisë së Veriut, një i arrestuar, në kërkim i vëllai

Nga OraNews Përditësimi i fundit 20 Qershor 2021, 09:13

Policia e Pogradecit ka goditur një rast të trafikimit të lëndëve narkotike nga Shqipëria drejt Maqedonisë së Veriut përmes liqenit të Ohrit.

Në pranga ka rënë 35-vjeçari Adrian Papajanis ndërsa është shpallur në kërkim i vëllai Fatjon Papajanis, 29 vjeç, të dy  banues në fshatin Hudënisht.

"Nga veprimet hetimore të kryera rezulton se këta dy shtetas në bashkëpunim me njëri-tjetrin, kryenin aktivitetin e paligjshëm të trafikimit të lëndëve narkotike nga Shqipëria, në drejtim të Maqedonisë së Veriut, duke përdorur kufirin liqenor të Ohrit. Falë veprimeve të mirëorganizuara, u bë e mundur kapja në flagrancë e shtetasit A. P., duke tentuar të trafikonte 1 kg lëndë të dyshuar narkotike kanabis, sasi e cila iu sekuestrua në cilësinë e provës materiale së bashku me një varkë, dy motora uji tip "Yamaha", dy peshore elektronike, mjete të cilat përdoreshin nga dy vëllezërit në këtë veprimtari të paligjshme" njofton policia.

Nga ana e Policisë, po punohet për identifikimin dhe vënien përpara përgjegjësisë ligjore të personave të tjerë të implikuar në këtë ngjarje.

Materialet i kaluan Prokurorisë pranë Gjykatës së Shkallës së Parë Pogradec për veprën penale "Trafikimi i narkotikëve" kryer në bashkëpunim.