Laçi ndez merkaton e Superiores, 4 blerje në pak ditë
Nga OraNews Përditësimi i fundit 13 Qershor 2021, 18:40
Ditët e fundit shikohen vetëm largime nga skuadrat e Kategorisë Superiore dhe ndërsa shumë klube ende nuk kanë bërë goditje të mëdha, është Laçi ekipi më aktiv në merkato.
Pothuajse në një javë, kurbinasit kanë bërë 4 goditje ku e fundit u zyrtarizua sot nga drejtuesit përmes një postimi në rrjetet sociale.
Është Marko Roganoviç që i bashkohet skuadrës së Laçit teksa mbrojtësi malazez firmosi për dy sezone dhe në vitin e kaluar ishte pjesë e OFK Titograd.
Përforcimi i pare ishte sulmuesi Saliou Guindo ndërsa më pas mesfushori Klinti Qato ishte ai që iu bashkua kurbinasve.
Ndërkohë që dje mbrojtësi Bashkim Velija firmosi si lojtari i tretë që vjen në merkato, sot drejtuesit përfunduan dhe goditjen tjetër Roganoviç.
Kujtojmë që nga Laçi ka patur edhe largime si Redon Xhixha, Nwabueze dhe Obanor por Laçi menjëherë ka ditur t’i zëvendësojë për të plotësuar grupin e skuadrës në prag të aventurës europiane të ekipit që u rendit në vendin e katërt në sezonin që u mbyll.
