Korça “kthehet” në Venecia për 2 orë, 110 mm shi përmbytin qytetin
Nga Iris Rezhda Përditësimi i fundit 8 Qershor 2021, 15:47
Të paktën 110 milimetra shi u regjistruan në harkun e dy orëve në Korçë, ndaj pas mesdite një pjesë e qytetit ishte nën pushtetin e ujit. Probleme pati edhe në zonat rurale, por pa probleme të mëdha për bujqësinë.
Korça për disa orë i ngjasonte Venecias.Pjesa më e madhe e rrugëve u përmbytën pas një stuhie shiu që përfshiu qytetin juglindor.
Niveli i ujit në disa zona doli mbi trotuare, duke shkaktuar vështirësi në lëvizjen e këmbësorëve dhe mjeteve në rrugë, siç mund ta shikoni edhe në video.
Situata më problematike u krijua në zonën e Pazarit të Ri dhe pranë Godinës së Tatimeve.
110 milimetër shi u regjistruan sipas sinoptikanëve vetëm në harkun e dy orëve.
Ky intensitet i lartë i prurjeve nuk u përballua nga rrjeti i kanalizimeve të qytetit ndaj uji vërshoi në rrugë.
Në zonat rurale reshjet e shiut grumbulluan inerte në rrugë e shtuan prurjet e përrenjve.
Pavarësisht intensitetit të lartë, reshjet e shiut nuk shkaktuan dëme në bujqësi e frutikulturë.
