"Ka gjetur mënyrën turku për t'i larguar njerëzit nga ky vend", dy javë protestë kundër reformës turke në Ulzë
Nga OraNews Përditësimi i fundit 3 Qershor 2021, 19:37
Vijon prej dy javësh protesta kundër vendimit të kompanisë turke që menaxhon Hidrocentralet e Ulzës e Shkopetit për shkurtimin e punonjësve. Të mbështetur nga sindikata, ata kërkojnë zbatimin e kontratave të punës.
Protesta kundër vendimit të kompanisë turke që menaxhon hidrocentralet e Ulzës e Shkopetit për shkurtimin e punonjësve shqiptarë ka hyrë në javën e dytë.
Punonjës, familjarë, banorë të zonës u mblodhën sërish para hyrjes së Hecit të Ulzës për të kërkuar zhbërjen e asaj që e konsiderojnë reformë që i lë pa bukë.
"Ka gjetur mënyrën turku për t'i larguar njerëzit nga ky vend."
Në mbështetje kanë tashmë edhe sindikalistë nga i gjithë vendi të cilët i janë drejtuar me një peticion qeverisë shqiptare dhe përfaqësive të huaja ndërkombëtare ku i vënë në dijeni me situatën.
"Ne kurrë nuk do të tërhiqemi nga kjo betejë, derisa ta fitojmë."
Sindikata denoncon sjelljen e kompanisë turke sipas saj në shkelje të kontratave të punës dhe kërkojnë rikthimin e punonjësve të larguar në punë.
"Të tërhiqet nga reformat e padrejta, të zbatojnë kontratën kolektive."
Punonjësit e HEC-eve dhe anëtarët e konfederatës së sindikatave kanë paralajmëruar se do të përshkallëzojnë protestën deri në grevë urie, nëse kompania turke dhe shteti shqiptar nuk reagojnë përballë situatës.
