Kërkimi për "arin e zi" në Fier irriton banorët, po u nxjerrin eshtrat e familjarëve nga varret
Nga Inelda Vallja Përditësimi i fundit 1 Qershor 2021, 13:38
Kërkimet për naftë në fshatin Visokë të Fierit, kanë çuar në përplasje mes banorëve dhe kompanive.
Sipas banorëve kompanitë naftënxjerrëse kanë dëmtuar varrezat e fshatit, çka për ta është e papranueshme.
"Ku e gjejnë fuqinë këta të prishin varrezat?"
Madje, ata shprehen se këto kompani kanë fshehur skeletet të cilët i kanë nxjerrë në sipërfaqe.
"U irrituam shumë. Vajtën te një pus afër varrezave dhe donin të kryenin punime me një traktor nga ata të mëdhenjtë. Traktoristi ndërhyri te pjesa e varrezave. Nxorën dhe eshtra varresh."
Për kërkimet e naftës banorët nuk ishin vënë në dije, ndërsa tanimë kërkojnë që firmat të marrin përgjegjësitë e tyre nëse duan të kërkojnë naftë në fshat.
"Firmat private kërkojnë të marrin prodhimin por nuk kërkojnë të mirëmbajnë rrugët, kanalizimet dhe problemet e tjera që u takon atyre."
Në këtë konflikt ka ndërhyrë edhe Bashkia e Fierit, e cila po përpiqet që të sqarojë të gjithë situatën ndërsa punimet janë ndërprerë deri në një moment të dytë.
