"Një pikë loti të derdhet nesër, mjerë ju!" Presidenti paralajmëron gjyqtarë e prokurorë: Respektoni ligjin!

Nga OraNews Përditësimi i fundit 24 Prill 2021, 20:08

Presidenti Ilir Meta ka dalë me një tjetër mesazh për zgjedhjet. Në një postim në facebook ai thotë se kriminelët janë kudo të rrezikshëm, por më të rrezikshmit janë kriminelët e veshur me uniformë, janë ata që gjenden brenda sistemit gjyqësor dhe të prokurorisë.

Me tone të ashpra, Kreu i Shtetit lëshon një paralajmërim të fortë.

Meta: Të dashur Prokurorë dhe Gjyqtarë! Dëgjojeni mirë Presidentin e Republikës! Boll dëgjuat përfaqësuesin e Ndrangheta-s, Don Agaçion. Nëse jo, një pikë gjaku të derdhet nesër, por edhe një pikë loti, mjerë ju! Nesër duhet të jetë Festa e Demokracisë!

Prandaj Meta apelon ti thërrasin mendjes.

Meta: Zbatoni ligjin, qëndroni larg ndikimeve politike, mos u bëni palë dhe ruani integritetin e detyrës.Përmbushni detyrën pa asnjë vonesë dhe mos e detyroni Popullin t'ju arrestojë në flagrancë përmes ligjit, që Kuvendi i Shqipërisë ka miratuar.

Presidenti i Republikës thotë se është gjithmonë me Kushtetutën dhe Sovranin dhe është gjithmonë gati për të marrë përgjegjësinë për çdo Dekret në mbrojtje të Zgjedhjeve, Demokracisë dhe Popullit nga dhuna e oligarkisë.

Meta: Nesër duhet të jetë Festa e Demokracisë.

Më herët Meta paralajmëroi se pas 25 prillit do të hetohet çdo krim zgjedhor dhe në mënyrë të veçantë çdo mos hetim i krimeve zgjedhore dhe policore para datës së zgjedhjeve.