"Përjashtohen" nga vota, mbi 23 mijë pacientë me Covid s'marrin pjesë në zgjedhje
Nga OraNews Përditësimi i fundit 24 Prill 2021, 20:03
Të infektuarit me Covid, emigrantët dhe personat me probleme me ligjin nuk do të kenë mundësi të votojnë të dielën e 25 prillit.Të drejtën e votës do ta kenë mbi 3.5 milionë shqiptarë, nga të cilët 107 mijë u drejtohen kutive të votimit për herë të parë.
Të dielën jo të gjithë do të kenë mundësi t`i drejtohen kutive të votimit për të shprehur vullnetin e tyre.
Pandemia privon nga kjo e drejtë kushtetuese mbi 23 mijë persona të cilët aktualisht janë të infektuar me koronavirus dhe në datën 25 nuk lejohen të dalin nga banesat e tyre.
Autoritetet nuk e mundësuan votimin e kësaj kategorie me argumentin se nevojiten ndryshime ligjore në Kuvend.
Vendimi i Komitetit Teknik të Ekspertëve pak ditë më parë penalizoi nga e drejta e votës emigrantët shqiptarë nga Greqia dhe Maqedonia e Veriut.
Sipas ekspertëve ata duhet të qëndrojnë dy javë në karantinë nëse vijnë në Shqipëri për shkak të rrezikut që mund të paraqesin për të tjerët.
Ky vendim, u shprehën ekspertët , pas shifrave të larta të infektimit në këto dy shtete.
Edhe këto zgjedhje politika nuk mundi të gjejë konsensus për të garantuar votën e emigrantëve kaq shumë e premtuar prej vitesh.
Sakaq të privuar nga e drejta për të votuar janë edhe mbi 1 mijë shtetas, të cilët nuk janë të përfshirë në lista për shkak të dekriminalizimit.
Janë mbi 3 milion e 500 mijë shqiptarë me të drejtë vote ndërsa 107 mijë prej tyre u drejtohen kutive të votimit për herë të parë ditën e dielë.
