Mediu për Vuçiç: Rama instrument i tij, ndërkombëtarët po kërkojnë ndryshimin
Nga OraNews Përditësimi i fundit 22 Prill 2021, 19:31
Thirrja e presidentit të Serbisë në një televizion Beograd për të votuar kryeministrin Rama dhe jo Bashën ka sjellë reagim edhe të Fatmir Mediut.
Në mbyllje të fushatës kreu i republikanëve u bëri thirrje shqiptarëve të mos votojnë kryetarin e PS duke e cilësuat instrument të Presidentit serb.
"Kjo nuk është e rastësishme që Vuçiç dhe Zaev duan Ramën sepse janë tashmë instrumente për të defaktorizuar rolin e rëndësishëm që fituan shqiptarët në këtë fillim shekulli me ndërhyrjen e NATO-së në Kosovë, pavarësinë e Kosovës," tha Mediu.
Ndërkombëtarët janë lodhur nga qeveria Rama dhe sipas Mediut po bëjnë thirrje të votoni ndryshimin.
"Është hera e parë në historinë e këtyre 30 viteve që Brukseli flet hapur dhe qartë, thotë votoni numrin 9, “Aleancën për Ndryshim,” tha Mediu.
Si aleat i Partisë Demokratike, kryetari i PR theksoi se do të ndikojë në zbatimin e të drejtës mbi pronën dhe në mbështetje të të dënuarve politikë.
