Prezenca e OSBE-së i dhuron Policisë së Shtetit 5 500 kopje të një libërthi për zgjedhjet

Nga OraNews Përditësimi i fundit 9 Prill 2021, 15:25

Prezenca e OSBE-së i dhuroi sot, Policisë së Shtetit 5 500 kopje një libërthi që do t’i ndihmojë punonjësit e policisë të cilët do të jenë të ngarkuar me detyra gjatë zgjedhjeve. 

Botimi i titulluar “Kujtesë – Detyrat e Policisë së Shtetit në proceset zgjedhore”, i cili u përgatit dhe u shtyp nga Prezenca, përmban udhëzimet e KQZ-së për rolin e policisë gjatë proceseve zgjedhore; rolin e policisë gjatë tubimeve; rolin e saj në ruajtjen e mjediseve, si qendrat e votimit dhe ato të numërimit të votave, si edhe në ruajtjen e materialeve zgjedhore.

Gjithashtu, ai përmban nene të Kodit Zgjedhor për veprat penale zgjedhore.

 Duke folur në veprimtarinë e organizuar në Drejtorinë e Përgjithshme të Policisë së Shtetit, në prani të Drejtorit të Përgjithshëm Ardi Veliu dhe zyrtarëve të tjerë të lartë të Policisë, Kryetari i Prezencës së OSBE-së, ambasadori Vincenzo Del Monaco tha se Prezenca dhe Policia kanë një qëllim të përbashkët: zgjedhje të organizuara në përputhje me standardet më të larta demokratike.

Ambasadori Del Monaco është shprehur “Libërthat që ne kemi dhuruar do të shërbejnë si mjet për zyrtarët e Policisë së Shtetit, për efektivët që do jenë duke zbatuar detyra gjatë ditës së zgjedhjeve.

Gjithashtu unë do ju dorëzoj edhe diçka tjetër që është më pak e prekshme. Janë tre fjalë që nisin me të njëjtën germë, me germën v: 1/vlerat - ju përfaqësoni mburojën e parë për vlerat e demokracisë, sepse jeni linja e parë e mbrojtjes për vlerat demokratike në të cilat bazohen zgjedhjet;

2/vokali ose zëri – me anë të punës tuaj jeni ju ata që siguroheni që qytetarët të kenë zë dhe që zëri i tyre të dëgjohet;

3/votoni edhe vetë. Gjithashtu ju ftoj që të vazhdoni të mbështeteni tek ne, tek mbështetja ime dhe tek mbështetja e personelit të Prezencës së OSBE-së në Shqipëri."

“Ju përfaqësoni një mburojë themelore për vlerat e demokracisë, jeni vija e parë e mbrojtjes e vlerave demokratike mbi të cilat mbështeten zgjedhjet. Përmes punës suaj, ju do të siguroni që njerëzit të kenë zë dhe zëri i tyre të dëgjohet”, - shtoi Del Monaco.