Bashkia Tiranë planifikon të ndërtojë 5 kulla në rrugën “Myslym Keta”, banorët kundër: Nuk kemi besim
Nga OraNews Përditësimi i fundit 3 Prill 2021, 19:38
5 kulla të reja pritet t`i shtohen kryeqytetit në muajt në vijim. Bashkia Tiranë planifikon të shembë 3 pallate në rrugën “Myslym Keta” duke ndërtuar mbi atë truall plot 5 kulla. Projekti u prezantua nga Ministri Arben Ahmetaj të shtunën por u kundërshtua nga banorët të cilët shprehen të vendosur për të mos dalë nga shtëpitë e tyre.
Gjatë mandatit të dytë, kryebashkiaku i Tiranës, Erjon Veliaj, ka vetëm një objektiv, ndërtimin e sa më shumë kullave dhe betonizimin e çdo metri katror të kryeqytetit.
Në rrugën “Myslym Keta” bashkia planifikon të shembë 3 pallate për t`i hapur rrugën ndërtimit të 5 kullave 8-katëshe.
Plani u prezantua nga ministri, Arben Ahmetaj, në prani të një pakice banorësh, pasi shumica prej tyre refuzuan takimin.
Banorët thonë se projekti nuk u ofron garanci dhe besim, ndaj e kundërshtojnë.
"Kërkojmë siguri juridike në lidhje me të gjitha procedurat e kryera deri tani."
"Nuk kemi besim fare te kjo qeveri, këta i duan vetëm për përfitimet e veta. Edhe nëse prishet pallati, me qira nuk pranoj".
Ata kërkojnë që pallati i dëmtuar nga tërmeti i 26 nëntorit të verifikohet nga ekspertë të pavarur.
"Premtime elektorale nga ana e Ministrit asgjë më tepër, kërkoj me insistim të vijë një komision i pavarur ekspertësh që ta verifikopjë edhe njëherë".
Pallati numër katër në rrugën “Myslym Keta” u vlerësua i banueshëm dhe pa dëmtime në strukturë në dhjetor të vitit 2019 nga Instituti i Ndërtimit.
Një vit e gjysmë më pas Bashkia Tiranë ka marrë vendim për shembjen e kësaj ndërtese ku jetojnë mbi 90 familje duke u bazuar në një akt ekspertimi të hartuar në fshehtësi të plotë sipas së cilit objekti paraqet rrezikshmëri dhe duhet prishur.
