Ekskluzive/Vrasja e "kumbarit" të Shkodrës, Ora News siguron videon e ekzekutimit të Bardhok Pllanaj
Nga OraNews Përditësimi i fundit 5 Prill 2021, 19:23
Ky është momenti ku makina me të cilën udhëtonte Bardhok Pllanajt qëllohet me breshëri arme nga pas.
Në videon ekskluzive të siguruar nga Ora News, shihet se Pllanaj ka humbur kontrollin e mjetit si pasojë e të shtënave, duke u përplasur me një biznes të lëndëve të ndërtimit.
Më pas autorët i kanë dalë në pjesën anësore duke e qëlluar sërish dhe më pas kanë ikur.
Gjithçka ka ndodhur rreth orës 21:10 të së dielës së 4 prill, ku 46-vjeçari po lëvizte me makinën e tij “Range Rover” në rrugën e Dobraçit kur një mjet tip “Volsvagen Passat” me targa italiane e ka ndjekur.
Brenda makinës së autorëve besohet se kanë qenë të paktën tre persona të cilët kanë qëlluar me breshëri arme, të cilat u gjetën të djegura bashkë me mjetin pas vrasjes.
Më shumë se 100 predha kanë prekur makinën e viktimës, ndërkohë që Pllanaj ka marrë 30 plumba në trup.
Pak minuta pas ngjarjes në komisariatin e Shkodrës u raportua për një makinë e cila po digjej në zonën e pompave në Dobraç.
Gjatë kqyrjes së mjetit policia konstatoi 2 armë zjarri të cilat u dërguan në laboratorin kriminalistik për një ekspertizë të detajuar.
Edhe pse në Shkodër policia lokale dhe FNSH angazhuan në kontrolle dhe krehjen e zonës pas ngjarjes, nuk ka asnjë të shoqëruar.
Përplasja mes grupe kriminale në Shkodër dhe prishja e pazareve të drogës, janë pistat kryesore që po hetohen në lidhje me ngjarjen.
Lexo edhe: U qëllua mbi 100 herë me armë zjarri, zbardhet dinamika e vrasjes së Bardhok Pllanajt
