Kosovë, vdesin nga Covid 21-vjeçarja dhe 41-vjeçarja shtatzënë
Nga OraNews Përditësimi i fundit 23 Mars 2021, 15:56
Dy gra kanë vdekur ditën e sotme në Kosovë si pasojë e Covid-19.
Një 21-vjeçare dhe tjetra 41-vjeçare, kanë ndërruar jetë në Klinikën Infektive në Qendrën Klinike Universitare të Kosovës (QKUK).
21 vjeçarja përveç që ishte e prekur me COVID-19 kishte dhe probleme të tjera shoqëruese.
Ndërkohë, 41-vjeçarja sipas Telegrafit ishte shtatzënë si dhe kishte edhe sëmundje të tjera shoqëruese.
“Zyra për informim e QKUK-së, ju konfirmon se bazuar në njoftimin nga Njësia e Mjekimit Intensiv Qendror- COVID, sot në orët e mëngjesit janë raportuar dy vdekje të pacienteve të konfirmuar me COVID-19. Një paciente e lindur në vitin 2000, e cila përveç se ishte e prekur nga COVID-19, kishte edhe probleme të tjera shoqëruese shëndetësore. Përkundër kujdesit maksimal nga ekipi kujdestar, ajo nuk ka arritur të mbijetonte. Po ashtu, rreth orës 06:35 një grua shtatzënë, e lindur me 1980, e konfirmuar si COVID-19, ka ndërruar jetë pas trajtimit disa ditor në këtë njësi. Po ashtu, kishte sëmundje të tjera shoqëruese”, - ka thënë zëdhënësja e QKUK-së, Mirlinda Qyqalla.
