Tubimet politike, Ministria e Shëndetësisë: Kufizimet vazhdojnë deri më 25 Mars
Nga OraNews Përditësimi i fundit 19 Mars 2021, 18:40
Ministria e Shëndetësisë ndryshon kohëzgjatjen e kufizimeve për grumbullimet pas vendimit të Gjykatës Kushtetuese i ardhur pas padisë së Partisë Republikane.
Sipas urdhërit më të ri, botuar në Fletoren Zyrtare, thuhet se ndryshon togfjalëshi “deri në një urdhër të dytë”, i cili zëvendësohet “deri në datën 25.3.2021”.
Pra kohëzgjatja e kufizimeve të tubimeve, për të cilin Gjykata Kushtetuese kërkoi rishikim vijon deri më 25 mars, fiks një muaj para zgjedhjeve.
Lexo edhe: “Komiteti i Ekspertëve të rishikojë brenda javës kufizimet”, Kushtetuesja zbardh vendimin për tubimet
URDHËR Nr. 158, datë 11.3.2021
PËR NJË NDRYSHIM NË URDHRIN NR. 633, DATË 17.11.2020 “PËR NDALIMINE GRUMBULLIMEVE NË VENDE TË MBYLLURA APO TË HAPURA”
Në mbështetje të nenit 102, pika 4, të Kushtetutës së Republikës së Shqipërisë, të nenit 7, pika4, të ligjit nr. 15/2016, “Për parandalimin dhe luftimin e infeksioneve dhe sëmundjeve infektive”, të udhëzimeve të Institutit të Shëndetit Publik, me qëllim mbrojtjen e shëndetit të popullatës nga infeksioni i shkaktuar nga COVID-2019, si edhe vendimit të Komitetit Teknik nr. 1356, datë 11.3.2021, URDHËROJ: Në urdhrin nr. 633, datë 17.11.2020, “Për ndalimin e grumbullimeve në vende të mbyllura apo të hapura”, bëhet ndryshimi si vijon:
1. Në pikën 1 të urdhrit, togfjalëshi “deri në një urdhër të dytë” zëvendësohet me togfjalëshin “deri në datën 25.3.2021”.
2. Ky urdhër hyn në fuqi menjëherë dhe botohet në Fletoren Zyrtare.
MINISTËR I SHËNDETËSISË DHE MBROJTJES SOCIALE
Ogerta Manastirliu
Lexo edhe: Covid-19, 16 viktima në 24 orët e fundit
