Qeveria "ndryshon" qëndrim: Lejon përdorimin e vaksinave kineze dhe ruse në popullatë
Nga OraNews Përditësimi i fundit 15 Mars 2021, 16:44
Ndonëse para pak kohësh Rama e refuzoi një ftesë për vaksina ruse, duket se qeveria shqiptare ka ndryshuar "mendim" lidhur me këtë çështje.
Përmes një akti normativ të datës 12 mars 2021 të publikuar në Fletoren Zyrtare parashikohet që të lejohet edhe përdorimin e vaksinave që nuk janë të certifikuara nga Agjencia Evropiane e Barnave apo FDA-ja amerikane.
Këto institucione momentalisht kanë certifikuar vaksina si Pfizer /BioNTech, Moderna dhe AstraZeneca.
Ndërkohë, vaksinat ruse dhe kineze nuk janë autorizuar nga këto institucione perëndimore.
pra, sipas këtij parashikimi në Shqipëri mund të përdoren edhe vaksina që janë prodhuar dhe aprovuar nga trupa të tjerë certifikues të vendeve që prodhojnë vaksina kundër Covid-19.
"Neni 2
Aprovimi i përdorimit të vaksinës në popullatë
Vaksinat anticovid-19 aprovohen për përdorim në popullatë bazuar në aprovimet e Food and Drugs Administration të Shteteve të Bashkuara të Amerikës (FDA), ose European Medicine Agency (EMA) të Bashkimit Evropian ose të trupave të tjera certifikuese të vendeve që prodhojnë vaksina anticovid-19." - thuhet në VKM.
Sic duket, për shkak të nevojës së vaksinave për vendin tonë, qeveria i ka lejuar vetës që t'i sigurojë ato edhe nga vende si Rusia dhe Kina që momentalisht prodhojnë vaksina.
