8 Dhjetori/ Maliqi: 25 Prilli. shpresa e vetme për të kapur ëndrrën "Shqipëria si gjithë Europa"

Nga OraNews Përditësimi i fundit 8 Dhjetor 2020, 09:30

Deputeti Lefter Maliqi, përmes një postimi në Facebook, kujton Lëvizjen Studentore të Dhjetorit '90 duke u shprehur se edhe sot, pas 30 vjetësh, ëndrra e tyre për ta bërë "Shqipërinë si gjithë Europa" nuk është realizuar ende.

Sipas Maliqit, 25 Prilli është shpresa e vetme e mbetur që ëndrra e mijëra studentëve më në fund të bëhet realitet, raporton Ora News.

"25 Prilli, është shpresa e vetme për të mos u vonuar më shumë drejt asaj ëndrre, ndryshe Shqipëria do të mbetet e vetme, pa gjakun që qarkullon nëpër venat e një vendi, Rininë", shkruan ndër të tjera deputeti.

Postimi i plotë i Lefter Maliqit:

E duam Shqipërinë pa Edi Ramën! 30 vite pas, të rinjtë shqiptarë kanë edhe një shpresë të fundit për të realizuar atë ëndërr, 25 Prillin.

Të dashur të rinj e të reja!Sot, dua t’ju uroj ju në këtë 30-vjetor të Lëvizjes Studentore të Dhjetorit, që mundësoi një jetë të lirë për të gjithë ju, e që sot falë asaj Lëvizjeje, Shqipëria feston Ditën e Rinisë.

E duam Shqipërinë si gjithë Europa! - Kjo ishte thirrja e të gjithëve atëherë, që në dyluftim me dhunën e regjimit, arritën ti dhuronin Shqipërisë një të ardhme të lirë.

Lufta për liri dhe demokraci u kurorëzua me fitore, fitore që festohet akoma edhe sot, me po të njëjtin emocion, por fatkeqësisht ende pa e përmbushur ëndrrën e atyre që luftuan për të ardhmen e Shqipërisë, të rinjtë heronj të Demokracisë.

Fatkeqësisht sot, 30 vite më pas, të rinjtë e këtij vendi bëjnë të njëjtën thirrje: E duam Shqipërinë si gjithë Europa!

Sot, më shumë se kurrë, pas 3 dekadash, në emër të asaj dite, do të luftojmë sërish për ta plotësuar atë ëndërr.

25 Prilli, është shpresa e vetme për të mos u vonuar më shumë drejt asaj ëndrre, ndryshe Shqipëria do të mbetet e vetme, pa gjakun që qarkullon nëpër venat e një vendi, Rininë.Sot, 30 vite pas, mijëra të rinj janë larguar në vendet e Evropës, pasi në Shqipëri, nuk shohin jo të ardhme, por as shpresë që të çon drejt saj.Këtë 30-vjetor, Evropa na e mbylli derën për të disatën herë.

Shqipëria po shpopullohet, ndaj nuk ka më kohë për të humbur!E duam Shqipërinë pa Edi Ramën, është thirrja e vetme që mund të bëjë realitet ëndrrën e heronjve të lirisë, 30 vite më parë.

/a.r, OraNews