Meta: Rajoni ka një armik, shpopullimin. Situata në Shqipëri kritike për shkak të qeverisjes së mbrapshtë
Nga OraNews Përditësimi i fundit 5 Tetor 2020, 17:03
Përmes një postimi në Facebook, presidenti Meta shkruan se rajoni ka një armik të përbashkët që është shpopullimi.
Meta thekson se në rastin e Shqipërisë, ky është një problem akoma më kritik për shkak të qeverisjes së mbrapshtë.
Meta: Të gjitha vendet e rajonit tonë kanë një armik të përbashkët: Shpopullimin, veçanërisht largimin masiv të të rinjve. Në rastin e Shqipërisë, situata është edhe më kritike se kudo tjetër, për shkak të një qeverisjeje të mbrapsht që nuk respekton liritë, të drejtat dhe dinjitetin e njeriut, ka shkallmuar shtetin e së drejtës, refuzon sundimin e ligjit, dhunon brutalisht demokracinë dhe provokon rëndë paqen sociale.
Të gjitha vendet në rajon, veçanërisht Shqipëria dhe Bosnje-Hercegovina, e duan integrimin evropian, që nuk duhet të jetë thjesht retorikë për të marrë financime nga Komisioni Evropian dhe institucionet e BE-së, por që në radhë të parë kërkon reforma të guximshme, të shpejta dhe të prekshme, që rikthejnë shpresën tek të rinjtë dhe garantojnë të ardhmen e sigurt evropiane të vendeve tona.
