SHBA: Qeveria siriane ka përdorur gazin sarin
Nga OraNews Përditësimi i fundit 26 Prill 2013, 08:48
Agjencitë amerikane të zbulimit besojnë se qeveria siriane ka përdorur gazin sarin në sasi të ulët kundër rebelëve që përpiqen të rrëzojnë nga pushteti presidentin Bashar al-Assad.Sekretari amerikan i Mbrojtjes Chuck Hagel tha gjatë një udhëtimi në Emiratet e Bashkuara Arabe se përdorimi i armëve kimike nga qeveria siriane shkel çdo konventë të luftës.Sipas tij, Shtëpia e Bardhë u ka dërguar një letër disa përfaqësuesve të kongresit për armët kimike në Siri, e ku konfirmohet përdorimi i tyre në një farë mase.Presidenti Barack Obama ka thënë se përdorimi i armëve kimike nga Siria do të sillte një ndryshim në politikën amerikane për të ndërhyrë në luftën civile dy-vjeçare në Siri.Edhe republikani John McCain tha se janë shkelur vijat e kuqe. McCain ka qënë në mbrojtje të një ndërhyrje më agresive të Shteteve të Bashkuara në konfliktin sirian.Agjentët e Shtetet e Bashkuara po punojnë tashmë për të përcaktuar detaje të përdorimit të armëve kimike, si vendet apo identitetin e individëve apo njësive ushtarake që janë përgjegjës.Konfirmimi i Uashingtonit vjen pak ditë pasi zyrtarë të shërbimeve sekrete izraelite deklaruan se në Siri po përdoren armë të ndaluara nga ligjet ndërkombëtare. Ndërkohë, regjimi në Damask akuzon rebelët për përdorimin e këtyre armëve, që sipas regjimit janë siguruar nga bazat ushtarake që kanë rënë nën kontrollin e grupeve të armatosura në veri të vendit.
