Policia në Malmo dëbon 200 emigrantë nga kampi, kryesisht rom
Nga OraNews Përditësimi i fundit 3 Nëntor 2015, 14:20
Policia në Malmo të Suedisë ka dëbuar emigrantët, shumica prej tyre romë, nga një kamp në afërsi të qendrës së qytetit, pavarësisht ndërhyrjes së aktivistëve të mbledhur në portat e kampit në mbrojtje të të drejtave të tyre.Rreth 200 persona kanë jetuar në këtë kamp të ndërtuar në tokë private për muaj të tërë. Këshilli i qytetit mori vendimin për mbylljen e tij javën e kaluar për shkak të kushteve sanitare, të cilat rrezikonin jo vetëm banorët e kampit, por edhe ata përreth.Zëdhënësii policisë së Malmos, Robert Loeffel, deklaroi se rreth 50 deri 100 persona janë larguar nga zona dhe një prej tyre është arrestuar.Ai shtoi se masat e rrepta si ndalime apo arrestime janë marrë vetën në rast rezistence, pasi forcat e sigurisë së qytetit u kanë kërkuar emigrantëve të largohen nga kampi prej ditësh.Fluksi i emigrantëve rom është rritur shumë vitet e fundit në Suedi, duke çuar edhe në rritjen e numrit të lypësve nëpër rrugë, markete e dyqane jo vetëm në Malmo, por edhe në kryeqytetin e vendit, Stokholm.Autoritetet vendase thonë se numri i lypësve ka arritur ne 5 mijë. Meqenëse shumica vijnë nga Rumania dhe Bullgaria, ata janë të lirë të udhëtojnë në Suedi si qytetarë të BE-së.Ndërkohë Suedia ka pranuar numrin më të lartë të klandestinëve për frymë, në kuadër të planit të rishpërndrajes së emigrantëve që kanë hyrë në Europë nëpërmjet Turqisë dhe Libisë, ose Italisë dhe Greqisë.
