Vrasja e Santos, Prokuroria kërkon lirimin e kushurinjëve Gjoza
Nga OraNews Përditësimi i fundit 14 Korrik 2014, 12:56
Tiranë- Arrestimi i Saimir dhe Klodian Gjozit si të dyshuar se kishin lidhje me vrasjen e bankierit Artan Santo, pritet ta kthejë hetimin në pikën e nisjes. Ditën e martë gjykata e Tiranës do të ndryshojë masën e sigurisë për ta dhe ti nxjerrë nga qelia e burgut, duke qenë se Prokuroria do të kërkojë për ta “detyrim paraqitje”.Burime nga organi i akuzës së kryeqytetit bëjnë me dije se është dorëzuar në gjykatën e Tiranës kërkesa për ndryshimin e masës së sigurisë për kushurinjtë, pasi në datën 30 qershor kjo gjykatë vendosi ti lërë në burg për 15 ditë.Ende nuk është sqaruar nga raporti i policisë shkencore nëse shenjat e barutit gjetur në duart e Gjozve,janë të lëna nga armë apo nga puna që ata kryejnë në një servis makinash. Saimir dhe Klodian Gjoza u arrestuan në zonën e Fushë-Krujës pas vrasjes së Artan Santos, pasi në servisin ku punonin u gjet një motor i ngjashëm me atë që u përdor në atentat.Por pas ekazaminive të ekspertëve u pa që dy motorat kishin ndryshime. Afati 15 ditor që u vendos nga gjykata, u la për të përfunduar ekspertiza e elementëve plotësues që mund të gjendeshin në trupat e kushurinjve.Kur kanë kaluar dy javë nuk janë gjetur faktorë të cilët i lidhin dy të rinjtë me vrasjen e bujshme ndodhur në Tiranë. Sipas avokatëve mbetjet e barutit mund të kenë ardhur nga puna në servis apo mjete të tjera që kushurinjtë mund të kenë hasur gjatë asaj dite në punë.Një fakt tjetër që forcon alibinë e dy kushurinjve që nuk kanë lidhje me ngjarjen janë dhe qelizat e telefonit. Të paktën nga tabulatet vërtetohet se dy rinjtë nuk kanë lëvizur nga fshati Ishëm ku dhe jetojnë.Ndërsa kjo forcohet dhe me dëshminë e gati 20 dëshmitarëve që vërtetojnë që Saimiri dhe Klodiani kanë qenë atë ditë në fshat. Kur kanë kaluar gati tre javë nga vrasja e bankierit, policia dhe prokuroria nuk kanë ende një të dyshuar dhe nuk ka ende një pistë konkrete ku te jetë fokusuar hetimi.
