Greqi, mister identiteti i vajzës bionde që jetonte me romët
Nga OraNews Përditësimi i fundit 19 Tetor 2013, 09:28
Policia greke po vijon hetimet për të zbuluar prindërit e vërtetë të vogëlushes 4-vjeçare e cila u gjet gjatë një operacioni në afërsi të Larisës.
Vajza 4-vjeçare e cila ka tipare dukshëm të ndryshme, nga ato të prindërve të supozuar quhet Maria dhe ka lëkurë shumë të bardhë, me flokë të verdhë e sy bojëqielli.
Vogëlushja flet gjuhën rome dhe nuk kupton fare greqisht, gjë që tregon se ajo ka qënë pranë romëve që foshnje.
Policia ka shpërndarë foton e vogëlushes dhe kërkon ndihmën e komunitetit për gjetjen e prindërve biologjikë të saj, ndërsa për këtë qëllim është njoftuar Interpoli dhe është vendosur bashkëpunimi me policitë e vendeve të Ballkanit.
Rasti ka vënë në lëvizje gjithë strukturat madje edhe qeverinë greke. Vetë kryeministri Samaras i ka kërkuar ministrit të Punës të jepet çdo ndihmë dhe mbështetje që është e mundur, për hetimet dhe gjetjen e prindërve biologjikë të fëmijës.
Ngjarja ka ngritur dyshimet se bëhet fjalë për një organizatë të madhe të trafikimit të fëmijëve.
Ndërkohë mediat britanike sjellin në vëmendje Madleinën e vogël të zhdukur në 2007 duke theksuar se identifikimi i Marias është një shpresë e re për prindërit e Madleinës së vogël.
