Berisha pret përfaqësuesen e partisë suedeze “Moderate”
Nga OraNews Përditësimi i fundit 28 Maj 2026, 21:26
Kryetari i Partisë Demokratike, Sali Berisha priti në takim Margaret Ceterfeld, përfaqësuese e partisë suedeze “Moderate”, e cila shprehu mbështetjen në kandidimin të tij për kryetar të Partisë Demokratike.
Gjatë takimit u diskutua mbi zhvillimet politike në Shqipëri, forcimin e bashkëpunimit mes forcave të djathta europiane dhe rëndësinë e mbrojtjes së vlerave demokratike, lirisë dhe shtetit të së drejtës.
Zyra e shtypit të PD njoftoi se, pjesë e rëndësishme e bisedës ishte edhe çështja e korrupsionit të lartë në Shqipëri, ndikimi i tij në institucionet demokratike dhe nevoja për një luftë reale kundër abuzimit me pushtetin dhe kapjes së shtetit.
Ceterfeld shprehu vlerësimin e saj për rolin dhe kontributin e Dr. Berishës në politikën shqiptare ndër vite, si dhe mbështetjen për një opozitë të fortë dhe të bashkuar në Shqipëri.
Sipas PD, ky takim konfirmon rëndësinë e marrëdhënieve dhe bashkëpunimit ndërkombëtar mes forcave konservatore dhe demokratike në Europë.
Në takim morën pjesë dhe Henrik Johansson, Albana Vokshi, deputete e Partisë Demokratike dhe kryetare e LDGSH.
