Valle popullore dhe trashëgimi/ Rrajca mirëpret edicionin e parë të festivalit folklorik me artistë nga Elbasan, Korçë dhe Librazhd
Nga OraNews Përditësimi i fundit 26 Maj 2026, 15:39
Në Rrajcë të bashkisë Përrenjas u mbajt edicioni i parë i festivalit folklorik “Rrajca e Valles”, një aktivitet që synon të kthehet në traditë vjetore dhe të trashëgohet ndër breza.
Fshati u mbush me tingujt dhe ritmet e folklorit, teksa në skenë u ngjitën artistë nga disa zona të vendit për të ndarë me publikun kulturën dhe identitetin e tyre.
Festivali u hap nga artistët e ansamblit folklorik të Bashkisë Përrenjas, të cilët sollën valle dhe këngë të njohura të Rrajcës, duke shpalosur trashëgiminë që kjo zonë ka ruajtur ndër vite.
Përveç ansamblit pritës, festivali u pasurua edhe me pjesëmarrjen e grupeve të tjera folklorike, të cilat sollën diversitetin kulturor të zonave të tyre. Grupi i Librazhd, si dhe trupa nga rajone të tjera të Elbasan dhe Korçë, i dhanë aktivitetit një karakter të gjerë rajonal, duke krijuar një skenë të përbashkët traditash, ritmesh dhe kostumesh popullore.
Secili ansambël solli elemente unike të zonës që përfaqësonte, duke e shndërruar festivalin në një mozaik të gjallë të kulturës shqiptare.
Gjatë aktivitetit u sollën në vëmendje edhe pasuritë natyrore të Përrenjas, si ura e Bushtricës, kanionet e Xixëllasit, rrapi shekullor i Bërzeshtës, pyjet e Stravajit, fusha e Domosdovës dhe kurora natyrore e Rrajcës.
Krahas këtyre bukurive, Rrajca u prezantua edhe me historinë e saj të lashtë, që nis që në kohën romake me stacionin e dikurshëm të Via Egnatia.
Festivali “Rrajca e Valles” vjen si një nismë që synon të ringjallë kujtesën, të ruajë identitetin kulturor dhe të bashkojë brezat përmes artit popullor. Organizatorët shprehen se ky është vetëm fillimi i një tradite që pritet të rritet vit pas viti.
