“Brenda 12 orësh e v*asim” / Antimafia italiane zbardh dosjen e grupit të Elvis Demçes. Rrëmbim dhe k*rcënime me a*më për 150 kg dr*gë
Nga OraNews Përditësimi i fundit 7 Maj 2026, 18:52
Një hetim i antimafias italiane në Romë ka zbardhur një dosje të rëndë që lidhet me botën e trafikut të drogës, rrëmbime dhe kërcënime me vdekje mes grupeve kriminale.
Në qendër të hetimeve është Manuel Grillà, një trafikant droge që dyshohet se ka bashkëpunuar edhe me bosin shqiptar të drogës Elvis Demçe.
Sipas dosjes, konflikti ka nisur pas humbjes së një sasie droge me vlerë rreth 150 deri në 200 mijë euro, gjë që ka çuar në përshkallëzim të dhunës.
Hetuesit thonë se për të rikuperuar paratë dhe drogën e humbur, grupi kriminal ka rrëmbyer babain e një ish-ortaku të tyre, duke përdorur presion dhe kërcënime të drejtpërdrejta ndaj familjes. Në mesazhe të zbardhura nga hetimet, i kërkohej kthimi i parave dhe i drogës, me paralajmërime se në të kundërt pengu do të vritej.
Në dosje përmenden edhe foto dhe mesazhe kërcënuese të dërguara gjatë mbajtjes peng të viktimës, ku shfaqeshin armë të drejtuara ndaj tij për të rritur presionin.
Hetimet përfshijnë edhe dëshmi të një bashkëpunëtori të penduar, i cili ka treguar për lidhje mes grupeve të ndryshme kriminale në Romë dhe për konflikte të vazhdueshme mes tyre për kontrollin e tregut të drogës.
Sipas autoriteteve italiane, këto grupe jo vetëm që bashkëpunojnë në trafikun e narkotikëve, por shpesh përfshihen edhe në përplasje të dhunshme për territor dhe fitime, ndërsa disa drejtues dyshohet se vijojnë aktivitetin edhe nga burgu përmes komunikimeve të fshehta.
Hetuesit e konsiderojnë këtë rast si një tjetër dëshmi të mënyrave të dhunshme dhe të organizuara që përdoren në botën e krimit të strukturuar në Itali.
