UKRAINA DREJT KUFIZIMIT TË SURROGATEVE/ Projektligji synon ndalimin e aksesit për çiftet e huaja

Nga OraNews Përditësimi i fundit 7 Maj 2026, 14:25

Parlamenti ukrainas po shqyrton kufizime të reja për industrinë e surrogateve. Projektligji synon të ndalojë aksesin për çiftet e huaja dhe të forcojë kontrollin mbi klinikat private.

Lufta në Ukrainë po shtyn gjithnjë e më shumë gra drejt surrogateve me pagesë, ndërsa varfëria dhe pasiguria ekonomike kanë rritur ndjeshëm numrin e grave që pranojnë të mbajnë fëmijë për çifte të huaja.

Sipas të dhënave, para nisjes së luftës Ukraina konsiderohej qendra e dytë më e madhe në botë për surrogate komerciale pas Shteteve të Bashkuara. Aktualisht, rreth 95% e prindërve që përdorin këto shërbime janë shtetas të huaj.

Por kjo pritet të marrë fund.

Parlamenti ukrainas po shqyrton vendosjen e kufizimeve të forta ndaj industrisë së surrogateve, në një moment kur debati etik dhe social mbi këtë praktikë është intensifikuar për shkak të luftës dhe krizës ekonomike.

Një projektligj i ri synon të ndalojë aksesin e çifteve të huaja në programet e surrogateve, ndërsa autoritetet kërkojnë më shumë kontroll mbi klinikat që operojnë në këtë sektor.

Mbështetësit e projektligjit argumentojnë se lufta ka rritur numrin e grave në vështirësi ekonomike dhe se klinikat po përfitojnë nga situata sociale për të tërhequr surrogate të reja.

Aktivistë dhe zyrtarë ukrainas pretendojnë se mungesa e rregullimit ka krijuar probleme serioze, duke përfshirë raste të fëmijëve të braktisur pas lindjes dhe akuza për trajtim të grave si pjesë e një tregu fitimprurës. Kritikët e sistemit kërkojnë jo vetëm kufizime për të huajt, por edhe rregulla më të ashpra për mënyrën si operojnë klinikat private të fertilitetit.

Në qendër të debatit është edhe një nga klinikat më të mëdha në Ukrainë, e cila është përballur me kritika dhe hetime lidhur me praktikat e saj.

Drejtuesit e kompanisë mohojnë çdo shkelje dhe argumentojnë se industria ndihmon çiftet që nuk mund të kenë fëmijë, ndërsa u ofron grave mundësi të ligjshme për të siguruar të ardhura.

Ndërkohë, autoritetet ukrainase pritet të vendosin në muajt në vijim mbi fatin e projektligjit, i cili mund të ndryshojë ndjeshëm funksionimin e industrisë së surrogateve në vend.