"Ligji lë shumë hapësirë për interpretim"/ Hamataj: Mungesa e kritereve të qarta krijon vendime të ndryshme në praktikë
Nga OraNews Përditësimi i fundit 28 Prill 2026, 21:22
Në emisionin “Ora e Betit” në Ora News, i ftuar ishte avokati Ermal Hamataj, i cili foli për debatin e fundit mbi mënyrën e trajtimit të të pandehurve në sallat e gjyqit, përfshirë edhe çështjen e vendosjes së tyre në kafaz xhami apo pranë avokatit.
Ai u ndal te neni i procedurës penale që lidhet me masat e sigurisë, duke vënë në dukje se mënyra si është formuluar lë hapësirë të gjerë interpretimi.
Sipas tij, mungesa e kritereve të qarta krijon vendime të ndryshme në praktikë.
Në diskutim u ngrit ideja se ligji duhet të përcaktojë më saktë rrethanat kur një i pandehur konsiderohet i rrezikshëm, duke marrë parasysh natyrën e veprës, mënyrën e kryerjes dhe sjelljen e tij gjatë procesit.
“Ligji aktual lë shumë hapësirë për interpretim. Duhet të ketë kritere më të qarta për të përcaktuar rrezikshmërinë e një të pandehuri, në mënyrë që vendimet të jenë më uniforme.”-tha Hamataj.
Eksperti vuri në dukje edhe pasojat që mund të sjellë mungesa e standardizimit, duke përmendur raste ku vendimet mund të ndryshojnë nga një gjykatë në tjetrën, edhe për situata të ngjashme.
“Pa një rregullim të qartë, krijohen situata ku i njëjti rast mund të trajtohet ndryshe. Kjo sjell paqëndrueshmëri në sistem dhe debat të panevojshëm publik.”-shtoi avokati.
Në pjesën tjetër të diskutimit u trajtua edhe reagimi i politikës ndaj këtyre çështjeve. Hamataj tha se shpesh institucionet reagojnë vonë ose selektivisht, ndonëse problematika ekziston prej vitesh.
Ai e përmbylli diskutimin duke e cilësuar sistemin e drejtësisë si një strukturë që ende ka nevojë për përmirësime në organizim dhe infrastrukturë, për të shmangur situata që krijojnë keqkuptime në opinionin publik dhe në sallat e gjykimit.
NDIQNI EMISIONIN E PLOTË "ORA E BETIT" NË ORA NEWS:
