SKANDALI I "ONE"/ Rritja e çmimit 'pagëzohet' si ‘inovacion’. Do paguhet me shumë për të njëjtin shërbim
Nga OraNews Përditësimi i fundit 17 Prill 2026, 10:40
Duke filluar nga data 1 maj 2026 abonentët e kompanise telefonike ONE Albania do të paguajnë më shtrenjtë faturat e tyre mujore.
Teksa xhepat e mijëra qytatarëve do të goditen nga rritja e çmimit, shërbimi i ONE nuk ka pësuar asnjë përmirësim.
E thënë me thjeshtë do paguhet më shtrenjtë për të njëjtin shërbim. Kjo rritje nuk përjashton as abonentët që kanë patur kontratë me çmim të fiksuar për 2 vite rresht.
Një shpjegim më të detajuar për rritjen e çmimit, abonentët e kanë kërkuar pranë kësaj kompanie.
Operatori “ONE” - Si mund t’ju ndihmoj?
Qytetarja: Më ka ardhur nje mesazh që do na rritet pagesa e ONE. Unë kam një numër me kontratë, është ky numër që po ju marr tani. Ne paraprakisht e kemi bërë marrëveshjen. Pse duhet të lëvizni ju nga kontrata ndërkohë që unë e kam firmosur për këtë vlerë.
Operatori “ONE” – Pasi edhe në kontratë është nënshkruar që nëse ndryshon invoacioni, mund të ndryshoje edhe çmimi i kontratës.
Qytetarja: Çfarë është inovacioni se nuk e kuptoj?
Operatori “ONE”: Janë ndryshimet e çmimeve në treg
Qytetarja: Në këtë shtesë që ju po bëni, jepni ndonjë shërbim plus?
Operatori “ONE”: Shërbimi i paketës është njësoj
Edhe pse në fjalorin shqip fjala inovacion ka kuptimin e risive teknologjike , në fjalorin e kompanisë “ONE” kjo fjale ka një tjetër kuptim, të paguash më shumë për të njëjtin shërbim. Një tjetër operator i “ONE” ka një tjetër variant
Operatori “ONE”: Në varesi të indeksit të rritjes së çmimeve, mund të ndryshojë edhe kontrata juaj
Qytetarja: Ma shpjego pak, ç’a është indeksi i çmimeve ?
Operatori “ONE”: Është këto rritjet që po ndodhin gjatë.... për pjesën e të gjithëve
Qytetarja: Çfarë është kjo?
Operatori “ONE”: Rritjet që po ndodhin në botë
Qytetarja: Në botë po rritet nafta, nuk po rritet telefoni celular
Operatori “ONE”: E kuptoj!
Mes "inovacionit" që nuk sjell asgjë të re dhe indeksit abonentët e ONE mbeten të vetmit që e kuptojnë qartë situatën: fatura e tyre po rritet pa asnjë shpjegim logjik.
Kur argumentet teknike dështojnë, e vetmja gjë që mbetet "inovative" në këtë mes është guximi i kompanisë për të kërkuar më shumë para për një shërbim që, siç e pranojnë edhe vetë operatorët, nuk ka ndryshuar fare.
Ne lidhje më këtë situatë Tv Ora News i është drejtuar me nje shkrese zyrtare AKEP, ku i kërkon monitorimin e tregut, dhe kuadrin ligjor mbi të cilën kompania e mbështet rritjen e çmimit.
