NDËRHYRJE TE KARBURANTET/ Malaj: 20% ulje e akcizës deri në stabilizim të tregut
Nga OraNews Përditësimi i fundit 3 Prill 2026, 15:42
Ministri i Financave, Petrit Malaj, njoftoi miratimin e një Akti Normativ që parashikon uljen e akcizës për karburantet, si një masë për të përballuar rritjen e çmimeve në treg.
Sipas vendimit, akciza do të ulet me 20% në rastet kur çmimi i naftës kalon mbi 220 lekë për litër dhe ai i benzinës mbi 200 lekë për litër, çmime të përcaktuara nga Bordi i Transparencës.
Kjo masë vjen në një moment kur tregjet ndërkombëtare janë të paqëndrueshme, kryesisht për shkak të situatës së tensionuar në Lindjen e Mesme.
Qëllimi i kësaj ndërhyrjeje është të lehtësojë barrën për qytetarët dhe bizneset, duke zbutur ndikimin e rritjes së çmimeve të karburanteve në ekonominë e përditshme.
Masat do të qëndrojnë në fuqi deri në stabilizimin e situatës ndërkombëtare, ndërsa autoritetet synojnë të ruajnë një ekuilibër mes mbrojtjes së konsumatorëve dhe qëndrueshmërisë së buxhetit të shtetit.
