“PD-në po e mbajnë peng” - Ervin Salianji: Kryetari sillet si skllavopronar, mandati i tij ka mbaruar me kohë

Nga OraNews Përditësimi i fundit 26 Mars 2026, 21:06

Demokrati Ervin Salianji, nuk heq dorë nga kritikat e ashpra drejtuar lidershipit aktual të forcës më të madhe opozitare në vend, duke theksuar se partia është uzurpuar nga një grup i ngushtë njerëzish për interesa personale.

I ftuar në një interviste në emisionin “Drejt” në “Ora News”, ku u prezantua nga moderatori Luan Rama si një “njeri i kontrasteve” dhe një hero i bazës demokrate në momentet kur gjykata vendosi ta dënojë, Salianji tani e gjen veten në atë që moderatori e cilëson si “ana e kundërt e medaljes” - i vetëpërjashtuar ose i margjinalizuar nga struktura zyrtare e partisë që ai ka mbështetur.

Salianji theksoi se diagnoza e problemeve në Partinë Demokratike fatkeqësisht përngjason me atë që po ndodh në mazhorancën qeverisëse.

“Kemi një uzurpim të funksionit në Partinë Demokratike. Kemi mos barazi para ligjit të brendshëm dhe mosrespektim të statutit”, deklaroi ai me tone të prera.

Sipas Salianjit, një lidership i përbërë nga jo më shumë se katër-pesë individë e trajton partinë si një aset privat, në vend që ta kthejë atë në një aset publik në shërbim të shoqërisë dhe demokratëve.

Një nga momentet më të forta të fjalës së tij ishte përdorimi i një terminologjie të rëndë për të përshkruar mënyrën se si trajtohen anëtarët e partisë nga lidershipi i lartë.

“Ka një mentalitet të skllavopronarit”, tha Salianji, duke lënë të kuptohet se disa individë brenda strukturës e pranojnë këtë nënshtrim për shkak të privilegjeve personale ose mungesës së kapaciteteve për të menduar në mënyrë të pavarur.

Duke iu referuar rikthimit të Sali Berishës në vitin 2022, Saliani renditi premtimet e pambajtura, të cilat i konsideron si bazën e nevojës për ndryshim urgjent.

Sipas tij, kur Berisha rimori drejtimin e PD-së pas krizës së thellë të 6 marsit 2022, ai premtoi publikisht se do të rrëzonte kryeministrin Edi Rama brenda gjashtë muajsh.

Ky premtim u shoqërua nga zotime të tjera madhore: fitorja në zgjedhjet lokale, pamundësia që zgjedhjet të vidheshin më, fitorja në zgjedhjet e përgjithshme, heqja e “nongratave” dhe rregullimi i marrëdhënieve me ndërkombëtarët, si dhe një proces transparent ku deputetët do të zgjidheshin drejtpërdrejt nga anëtarësia e partisë.

“Të gjitha këto janë premtime të pambajtura” nënvizoi Salianji. Për të përforcuar argumentin e tij juridik dhe moral, ai solli në vëmendje Nenin 46 të Statutit të Partisë Demokratike.

Ky nen u trumbetua nga vetë Sali Berisha si mekanizmi i përsosur llogaridhënës për të shmangur justifikimet që bënte ish-kryetari Lulzim Basha pas çdo humbjeje.

Neni thekson qartë se, nëse Partia Demokratike nuk del forcë qeverisëse pas zgjedhjeve të përgjithshme, kryetarit i humbet mandati në mënyrë të menjëhershme dhe nuk ka më të drejtë të rikandidojë.

“Këtu nuk ka as po, as nëse. Nuk ka ndodhur asgjë për të mbajtur këtë përgjegjësi”, argumentoi Ervin Salianji. Ai theksoi se refuzimi i lidershipit për t'iu nënshtruar rregullave që vetë i ka shkruar dhe votuar tregon një kolaps të demokracisë së brendshme.

Ky qëndrim i Salianjit dëshmon një thyerje të thellë brenda opozitës, ku kërkesa për meritokraci dhe respektim të statutit përplaset ashpër me mentalitetin tradicional të udhëheqjes me dorë të hekurt, duke ngritur pikëpyetje serioze mbi aftësinë e Partisë Demokratike për t'u paraqitur si një alternativë e besueshme qeverisëse për shqiptarët në zgjedhjet e ardhshme.

PJESË NGA BISEDA

Luan Rama: Zoti Salianji, çfarë po ndodh me Partinë Demokratike? Se çfarë ndodh me Partinë Socialiste, në fakt jo me Partinë Socialiste, por me qeverinë, me mazhorancën, e kemi të qartë, na e bën të qartë SPAK-u nga njëra anë dhe kryeministri nga ana tjetër. Po në Partinë Demokratike çfarë po ndodh?

Ervin Salianji: Fatkeqësisht është e njëjta gjë. Pra kemi një uzurpim të funksioneve në Partinë Demokratike, kemi jo barazi para ligjit, para ligjit të brendshëm, kemi mosrespektim të Kushtetutës së brendshme të partisë, që është statuti i Partisë Demokratike. Dhe ka, fatkeqësisht, një grup të vogël njerëzish të cilët duan ta mbajnë për interesa dhe privilegje personale Partinë Demokratike peng, duke mos e lënë që të jetë një aset publik siç duhet të jetë, në shërbim të publikut dhe të interesave të shoqërisë, por duke e mbajtur për interesa të cilat unë mendoj për shkak të privilegjeve personale që kanë, por nuk dua të aludoj për më shumë. Por është e qartë që ka një uzurpim për qëllime që nuk i shërbejnë interesave të demokratëve dhe që nuk i shërbejnë interesave...

Luan Rama: Është një grup i vogël apo është një individ për të qenë pak më të drejtpërdrejtë?

Ervin Salianji: Po pa diskutim që vjen nga individi, por është edhe një grup i vogël që mund të jetë një grupim i vogël po them që po e quaj lidershipi i partisë, që nuk janë shumë...

Luan Rama: Keni parasysh katër, pesë persona, kryesinë e partisë?

Ervin Salianji: Fatkeqësisht, më vjen keq që ta them, por aty kryetari i partisë sillet me mentalitetin e skllavopronarit dhe mendon që mund t'i skllavërojë një pjesë. Nuk janë të gjithë skllevër, nuk janë të gjithë skllevër, por një pjesë fatkeqësisht sillen si të tillë dhe janë, edhe për shkak të kapacitetit mendor që ka njëri për shembull që është pas tij. Është, ai fiks në rol për atë punë. Po... është një situatë ku po themi, po shumë shkurt po them disa elementë. Sali Berisha u rikthye në vitin 2022 në Partinë Demokratike me disa premtime. Mandati është një koncept që po themi, i lë një afat kohor atij që e merr mandatin për të mbajtur premtimet dhe për të realizuar premtimet që jep në fushatë. Sali Berisha premtoi që do ta mundte Edi Ramën brenda gjashtë muajsh, premtoi që do fitonte zgjedhjet lokale, premtoi që nuk i vidheshin zgjedhjet më të në krye të partisë, premtoi që do ta mundte në zgjedhjet e përgjithshme, premtoi që do të hiqte non-gratën, premtoi që do t'i rregullonte marrëdhëniet me ndërkombëtarët, premtoi që deputetët do të zgjidheshin nga anëtarësia. E një sërë premtimesh të tjera, të gjitha janë premtime të pambajtura. Dhe ndërkohë, premtoi po ashtu, duke thënë publikisht që ia vjedhin Lulzim Bashës zgjedhjet, po unë për të hequr këtë elementin “nuk ikën”, për të hequr këtë elementin, po themi, argumentimit të kotë apo justifikimit pas humbjes së zgjedhjeve, po vendos një nen, që është neni 46 i statutit, ku qartësisht thuhet që nëse Partia Demokratike nuk është forcë qeverisëse pas zgjedhjeve të përgjithshme, kryetarit i humbet mandati në mënyrë të menjëhershme dhe nuk ka të drejtë të rikandidojë. Pra këtu nuk ka jo, por, jo nëse, jo po si, po o zotëri, Partia Demokratike nuk është forcë qeverisëse. Është lënë një periudhë deri tani që janë zgjedhjet, për të qenë brenda mandatit, sepse do ketë prova, do ketë kështu, do t'i rikthejë zgjedhjet. S'ka ndodhur asgjë.

NDIQNI EMISIONIN E PLOTË “DREJT” NË “ORA NEWS”