VIDEO/ ABAZ ALIU “VISHET” ME TË BARDHA! Tyrbja në malin e Tomorit mbulohet nga dëbora e fillimvitit
Nga OraNews Përditësimi i fundit 4 Janar 2026, 16:32
Tyrbja e Abaz Aliut në malin e Tomorit ka ofruar pamje magjepsëse të mbuluara nga dëbora këtë fillim janari. Pamjet janë ndarë nga kryeministri Edi Rama në rrjetet sociale. Tomori mbetet një destinacion i rëndësishëm turistik, natyror dhe fetar gjatë gjithë vitit.
Në një lartësi prej 2417 metrash mbi nivelin e detit, Tyrbja e Abaz Aliut, e vendosur në Çukën e Tomorit, ka ofruar këtë fillim viti një pamje mbresëlënëse, e mbuluar nga “velloja” e bardhë e dëborës. Temperaturat e ulëta dhe era kanë krijuar forma natyrore spektakolare, duke e shndërruar vendin e shenjtë në një peizazh dimëror unik.
Pamjet janë ndarë nga kryeministri Edi Rama, i cili publikoi fotografi nga Mali i Tomorit, një nga zonat më të rëndësishme natyrore dhe shpirtërore të vendit. I veshur me petkun e borës, Tomori ka marrë një pamje që tërheq vëmendjen e adhuruesve të natyrës dhe fotografisë.
I konsideruar një destinacion turistik për aventurierët, alpinistët dhe besimtarët, Tomori vizitohet gjatë gjithë vitit, por dimri i jep malit një hijeshi të veçantë. Mali shtrihet në lindje të Berat dhe në verilindje të Çorovodë, duke gëzuar statusin e Parkut Kombëtar.
Ndërsa në muajt e dimrit fton të apasionuarit pas alpinizmit dhe natyrës së egër, çdo fundgushti Mali i Tomorit kthehet në qendër pelegrinazhi për besimtarët bektashi, të cilët kremtojnë aty festën më të rëndësishme të vitit, duke e ruajtur Tomorin si simbol të besimit dhe trashëgimisë shpirtërore shqiptare.
