Lumi Drin si landfill mbetjesh/ Shtimi i prurjeve ka sjellë mbeturina të shumta që përfundojnë në det
Nga Ora News Përditësimi i fundit 28 Shkurt 2023, 13:40
Lumi Drin në Lezhë është kthyer një mbledhës mbeturinash, të cilat më pas derdhen në detin Adriatik. Problemi bëhet shqetësues sa herë ka reshje pasi përrenjtë e fshatrave por edhe kanalet e qytetit çojnë mbetje në lumin Drin. Pamjet që vijnë nga atje janë shqetësuese ndërs autoritetet duket se kanë dështuar në rehabilitimin e lumit.
Kjo është pamja e Lumit Drin në Lezhë, pas reshjeve të shiut që ranë të hënën.
Shtrati i lumit të ngjan me një landfill mbeturinash.
Qelq, plastike e materiale të tjera lundronin në lumë, e më tej përfundojnë në det, duke krijuar një ndotje të madhe dhe panoramë aspak të këndshme për një zonë turistike siç është Lezha.
Në grykëderdhjen e lumit Drin, të dy anët e bregdetit janë mbuluar nga mbetje të ndryshme e deri të kafshët e ngordhura, të cilat kanë zënë vend prej kohësh.
Shkaktari i kësaj ndotje është vetë dora e njeriut që i hedh mbetjet jashtë vendeve të përcaktuara, që me shtimin e prurjeve në kohë reshjesh merren nga rrjedha e ujit.
Kjo është një problematikë e vazhdueshme që tregon dhe dështimin e institucioneve përgjegjëse në menaxhimin e mbetjeve urbane, që po sjell një ndotje mjaft të madhe të bregdetit.
Lumi Drin ka një gjatësi prej 285 km dhe një basen mbi 14 mijë km katrorë, pjesa më e madhe e të cilit përshkon zonën e Lezhës.
Krahas ndotjes që po krijon, ku lumë është kthyer në një kërcënim serioz përmbytjesh.
