Durrës, kishte përshtatur lokalin për shitjen e drogërave, prangoset 46-vjeçarja
Nga OraNews Përditësimi i fundit 19 Shkurt 2023, 11:54
Arrestohet në flagrancë 46-vjeçarja në Durrës, pasi kishte përshtatur lokalin për shitjen e drogave të forta, në doza.
Gjatë kontrolleve nga policia ndaj kësaj shtetaseje dhe në lokal, u gjet dhe u sekuestrua në cilësinë e provës materiale, një sasi lënde e dyshuar narkotike kokainë, e ndarë në doza, të gatshme për shitje.
“Specialistët e Seksionit për Hetimin e Narkotikëve dhe Trafiqeve të Paligjshme të DVP Durrës, si rezultat i kontrolleve të pandërprera, në ambiente të ndryshme në këtë qark, për të cilat sigurohet informacion nga inteligjenca informative, se mund të vihen në dispozicion të paligjshmërive të ndryshme, kanë konstatuar dhe goditur një rast të përshtatjes së një lokali, për përdorim droge. Për këtë rast, është arrestuar në flagrancë shtetasja A. S., 46 vjeçe, banuese në Durrës.” - njofton policia.
Materialet procedurale i kaluan Prokurorisë pranë Gjykatës së Rrethit Gjyqësor Durrës, për veprime të mëtejshme për veprat penale "Prodhimi dhe shitja e narkotikëve" dhe "Përshtatja e lokalit për përdorim droge".
