Ancelotti i “tërheq veshin” Rodrygo-s: Duhet të më përshëndesë kur zëvendësohet...
Nga OraNews Përditësimi i fundit 20 Janar 2023, 09:20
Te Real Madrid ka vetëm një shef, ai është Carlo Ancelotti. Trajneri italian që ka fituar gjithçka të mundshme me klubin “Los Blancos” është njeriu kyç në skuadër dhe klub e si të tillë duhet ta respektojnë të gjithë.
Kështu mendon presidenti Florentino Perez, lojtarët më të mirë të skuadrës si Benzema, Modric apo Kross, por jo braziliani Rodrygo. I zëvendësuar në ndeshjen e Kupës së Mbretit kundër Villarreal, lojtari “merengues” nuk e priti aspak mirë vendimin e italianit duke evituar përshëndetjen me të në momentin që la fushën.
Ancelotti nuk ngurroi të reagonte menjëherë në të nxehtë duke i kujtuar brazilianit se askush nuk mund të reflektojë mungesë respekti ndaj trajnerit. Në konferencën për shtyp pas sfidës së fituar me vështirësi 3-2, Ancelotti theksoi:
“Nuk më përshëndeti sepse besoj që harroi. Nuk shikoj arsye të tjera. I thashë që nuk duhet të harrojë të përshëndesë trajnerin kur zëvendësohet”.
