Më i vogli në 43 të mbijetuar 11 vjeç, fytyrat e frikësuara të emigrantëve. Zbulohet mesazhi zanor: Na ndihmoni!

Nga OraNews Përditësimi i fundit 14 Dhjetor 2022, 21:29

Katër emigrantë humbën jetën dhe po kaq rezultojnë të zhdukur pas një misioni dramatik shpëtimi në Kanalin Anglez sot, nga i cili u nxorën nga ujërat e ngrira 43 emigrantë pasi gomonia e tyre u fundos në orët e para të mëngjesit të sotëm. 

Një djalë 11-vjeçar afgan ishte në mesin e emigrantëve të tërhequr nga ekuipazhi i anijes së peshkimit Arcturus, e cila ishte ndër anijet e para që mbërriti në skenën e tmerrshme, e përshkruar nga kapiteni si një skenë filmi nga Lufta e Dytë Botërore.

Kalimi i rrezikshëm erdhi pavarësisht temperaturave të ngrira dhe vetëm disa orë pasi kryeministri Rishi Sunak njoftoi një goditje të re ndaj imigracionit të paligjshëm, për të cilin disa deputetë thanë se është më jetike se kurrë pas ngjarjeve tragjike të sotme, të cilat dyshohet se u orkestruan nga një trafikant në Francë, i cili kishte marrë 5000 £ nga secili emigrant.

Pamjet nga operacioni i shpëtimit të mëngjesit të sotëm treguan frikën dhe tmerrin e skalitur në fytyrat e disa të rinjve dhe djemve që rrezikuan jetën e tyre për të arritur në Britani. 

Ata që vdiqën në këtë proces janë të gjithë të rritur, ndërsa shpresa për gjetjen gjallë të 4 të zhdukurve veniten pasi gomonia e tyre hyri në telashe rreth orës 3 të mëngjesit.

Gra dhe fëmijë ishin gjithashtu në mesin e atyre që u shpëtuan, me raporte se shumë të mbijetuar po luftojnë për jetën e tyre në spital sonte. 

Një zëdhënës i një shoqate bamirësie franceze tha se ishte një mesazh zanor në orët e hershme të mëngjesit nga emigrantët në një varkë të mbytur me ujë që luteshin për ndihmë që fillimisht ngriti alarmin dhe se foshnjat mund të dëgjoheshin duke bërtitur në sfond. 

Nikolai Posner, oficer i komunikimit për Utopia 56 që ndihmon emigrantët në Calais, tha se një shënim zanor 22 sekondash në WhatsApp u la rreth orës 2 të mëngjesit me kohën e Mbretërisë së Bashkuar.

Në mesazh, një burrë mund të dëgjohet duke thënë 'na ndihmo, na ndihmo' dhe se brenda varkës kishte ujë me 'familje dhe fëmijë' në bord, tha Posner për PA.

Ai tha: “Ishte qartë një emergjencë, ai po bënte thirrje për ndihmë. Ishte si 'na ndihmo, na ndihmo, na ndihmo, kemi nevojë për ndihmë' ... Në sfondin e mesazhit mund të dëgjojmë foshnjat duke bërtitur.'

Posner tha se Organizata u përpoq t'i përgjigjej mesazhit, por përgjigja nuk u mor, më pas ata kontaktuan rojet bregdetare franceze dhe britanike. 

Është e paqartë pse një varkë shpëtimi u nis vetëm një orë pasi organizata bamirëse informoi rojet bregdetare për mesazhin e shqetësimit, tha Posner, duke shtuar: "Ne nuk e dimë se çfarë ndodhi në të vërtetë gjatë asaj kohe."

Ben Squire, pronar i anijes së peshkimit që mbërriti i pari në vendngjarje, tha për MailOnline se si shpëtoi dhjetëra emigrantë. 

Ai tha: “Ne arritëm të shpëtonim 31 persona, pjesa tjetër u kap nga Costguard ose fatkeqësisht kanë vdekur ose supozohet se janë të zhdukur.

“Ne morëm katër fëmijë nga varka. Më i riu ishte një djalë 11-vjeçar nga Afganistani, i cili ishte me familjen e tij. Fëmijët e tjerë erdhën nga Senegali dhe Afganistani.

“Ata që u sollën në bord ishin në kushte të ndryshme. Disa ishin në gjendje kritike, të tjerët ishin më pak të lënduar, të cilëve iu dha një dush i nxehtë, ushqim dhe veshje të thata të ekuipazhit.

"Siç e kuptoj unë, ishin të paktën katër persona të vdekur në ujë. Të tjerët besohet se janë të zhdukur.

Ray dhe ekuipazhi shpëtuan kaq shumë jetë, ata vepruan shpejt dhe janë të gjithë heronj.

Ekuipazhi i peshkimit, i drejtuar nga Ray Strachan, më herët dha një rrëfim tronditës se si emigrantët e mbytur 'bërtitën' për ndihmë.

Kapiteni Ray i përshkroi skenat si "diçka nga një film i Luftës së Dytë Botërore", duke thënë për Sky News: "Kishte njerëz në ujë kudo, duke bërtitur". 

Ata që u morën në bord, të cilët erdhën nga Afganistani, Iraku, Senegali dhe India,  thanë se i kishin paguar nga 5,000 £ një trafikanti në Francë për kalimin e tyre.