Rama: Sulmet në veri të Kosovës të dënueshme, Beogradi të ndikojë te serbët, BE të ndërhyjë
Nga OraNews Përditësimi i fundit 11 Dhjetor 2022, 14:48
Ka reaguar edhe kryeministri Edi Rama lidhur me sulmet serbe në Veri të Kosovës duke thënë këto sulme janë të dënueshme.
Ai thotë se barrikadat janë të dënueshme dhe se shtyrja e votimi nga Kosova është një sinjal që Beogradi duhet t’i përgjigjet me përgjegjësi.
Ai shton se Beogradi duhet të ushtrojë ndikimin e vet mbi serbët e Veriut të Kosovës, pa i justifikuar assesi veprimet e tyre cilatdoqofshin arsyet.
Rama: Sulmet mbi EULEX janë të dënueshme pa asnjë ekuivok ashtu siç është i dënueshëm çdo akt dhune ndaj policisë së Kosovës. Rishfaqja e barrikadave në Veri të Kosovës, bie ndesh me çdo ligj e çdo frymë dialogu e jo vetëm nuk zgjidh asgjë, po përkundrazi komplikon më tej çdo gjë!
Shtyrja e votimeve nga ana e Presidentes së Republikës së Kosovës është një sinjal kuptimplotë, të cilit autoritetet e larta të Beogradit duhet t’i përgjigjen me të njëjtën frymë dhe ndjenjë përgjegjësie, për moslejimin e përshkallëzimeve të mëtejshme të akteve destabilizuese!
Beogradi duhet të ushtrojë ndikimin e vet mbi serbët e Veriut të Kosovës, pa i justifikuar assesi veprimet e tyre cilatdoqofshin arsyet! Arsyet diskutohen nuk përdoren si armë kundër policisë e si barrikada kundër rendit ligjor. BE-ja duhet të thërrasë urgjent tryezën e dialogut.
