Shkodra “po thahet” para Lezhës/ Uji po tërhiqet, por mijëra hektarë tokë ende të përmbytura
Nga Bepin Kolvataj Përditësimi i fundit 24 Nëntor 2022, 08:41
Uji nga zonat e përmbytura në Shkodër po tërhiqet më shpejt se në Lezhë. Pavarësisht ndërprerjes së reshjeve në disa zona situata ende mbetet problematike.
Sipërfaqja e tokës së përmbytur në Shkodër këtë të enjte, ra në 1130 hektarë, për herë të parë më e ulët se në Lezhë, ku rreth 1300 hektarë janë ende nën ujë.
Me ndërprerjen e reshjeve, uji po tërhiqet, por në disa zona situata ende mbetet problematike.
Në rrugën e Obotit në Shkodër, deri në mesdite kishte rreth 25 centimetra ujë, çka e bënte të kalueshme vetëm për mjetet e ushtrisë. Dy ujësjellësit Oblika 1 dhe 2, mbeten jashtë funksionit.
Nuk raportohet për banesa me prani uji, por 7 familje ende nuk janë rikthyer në shtëpitë e tyre, pas vërshimit të ujit.
Lumejt Buna dhe Drin, kanë zbritur nën nivelet kritike.
Në fshatin Kakarriq të Lezhës ka ende ujë në oborret e banesave të përmbytura, dhe lëvizje bëhet vetem me çizme.
Banorët thonë se përmbytja u shkaktoi dëme të mëdha.
“Pash Zotin, dhe gjendjen psikologjike na ka dëmtuar. Ka rën 30 centimetër niveli,” tha një banore.
Në Mirditë një banesë dy katëshe rrezikohet nga rrëshqitja e dherave, fenomen që ka dëmtuar rrugët dhe në fshatrat e Bashkisë Pukë.
580 pako ushqimore dhe 15 tonë bazë ushqimore për bagëtitë, janë shpërndarë në Shkodër, 150 në Pukë ,100 në Vaun e Dejës dhe 320 në Malësi të Madhe, sipas të dhënave, nga Qendra Kombëtare Operacionale e Emergjencave Civile.
