Detaji/ Humbi jetën pasi e ndaloi policia, 32 vjeçari mbërriti i vdekur në spitalin e Traumës
Nga Ora News Përditësimi i fundit 20 Tetor 2022, 09:14
Detaje të reja kanë dalë nga vdekja e mistershme e 32 vjeçarit që u ndalua nga një patrullë policie për kontroll, në Tiranë, mbrëmjen e 19 tetorit 2022
Mësohet se i riu i identifikuar si Lear Kurti ka mbërritur pa shenja jete në Spitalin e Traumës, informon gazetari i Ora News Edison Vatnikaj
"Burime nga spitali bëjnë me dije se 32 vjeçari ka ardhur pa shenja jete në ambjentet e Traumës. Pra ka ndërruar jetë më herët dhe është paraqitur pa shenja jete në spital.
32 vjeçari ka ndërruar jetë përpara se të mbërrinte në spital, pasi edhe në raportin e spitalit të Traumës, është bërë me dije se shtetasi L.K. ka ardhur pa shenja jete në spital. Kjo është për tu theksuar pasi në raportin e AMP-së thuhet se është dërguar në spital me mjetet e policisë në ambjentet e spitalit, ku dhe ka ndërruar jetë.
Do të jetë ekspertiza mjeko ligjore që do të zbulojë shkaqet e vdekjes prandaj trupi i pajetë i 32 vjeçarit është dërguar në morgun e spitalit të Traumës.
Dyshimet janë se i riu mund të ketë kaluar një arrest kardiak, por do të jenë mjekët që do të përcaktojnë saktësisht shkaqet e vdekjes së tij.
