Edhe 2 vjet kohë për dialogun Kosovë-Serbi, Lajçak: Kemi një dritare mundësie deri në vitin 2024
Nga Amado Çela Përditësimi i fundit 13 Tetor 2022, 15:56
Kosova dhe Serbia kanë një shans të artë për t’i zgjidhur mosmarrëveshjet deri në 2024. Pas këtij viti, sipas të dërguarit të posaçëm për dialogun, Lajçak agjenda politike e SHBA-së dhe BE-së mund të ndryshojnë pasi ato do të përballen me zgjedhje pas dy vitesh.
I dërguari i Posaçëm i Bashkimit Evropian për dialogun mes Prishtinës dhe Beogradit pas takimit me kreun e qeverisë së Kosovës, zotin Kurti deklaroi se dialogu për normalizimin e marrëdhënieve duhet të përshpejtohet.
Mirosllav Lajçak tha se ekziston një dritare mundësie deri në 2024, kohë kur Bashkimi Evropian dhe Shtetet e Bashkuara kanë zgjedhjet qendrore.
Lajçak: Ne kemi Aleancën unike të BE dhe SHBA në dialog dhe jemi të gatshëm të shohim dialogun që prodhon normalizim. Nuk do të thosha se viti i ardhshëm është vendimtar, por kemi një dritare mundësie, e cila do të zgjasë deri në zgjedhjet evropiane dhe zgjedhjet në SHBA në vitin 2024. Dhe mendoj se është përgjegjësia jonë të mos e humbim këtë dritare të mundësive.
Diplomati sllovak tha se me zotin Kurti kishte biseduar edhe për e asistimin e Francës dhe Gjermanisë në procesin e dialogut.
Presidenti Macron dhe kancelari gjerman propozuan që Serbia të lejonte Kosovën të përfshihej në organizata ndërkombëtare dhe Beogradi të merrte okay-n për anëtarësim në Bashkimin Evropian.
Lidhur me këtë kryeministri Kurti ka shprehur gatishmërinë për ta marrë në konsideratë, por sipas tij nuk ka pasur propozim konkret.
