Tragjedi në Libi: 15 trupa janë gjetur në bregun perëndimor, dyshohet se janë emigrantë
Nga OraNews Përditësimi i fundit 7 Tetor 2022, 22:47
Pesëmbëdhjetë trupa, disa të djegur, janë gjetur në bregdetin e qytetit perëndimor të Libisë Sabratha, ka njoftuar Gjysmëhëna e Kuqe Libiane, me aktivistët e të drejtave të njeriut që thonë se ata janë emigrantë të paligjshëm.
Pasi u alarmuan nga autoritetet lokale për zbulimin e këtyre trupave, vullnetarë nga dega e Gjysmëhënës së Kuqe në Sambratha, 70 km në perëndim të kryeqytetit, Tripoli, shkuan në vendngjarje dhe i transferuan trupat në morgun e spitalit të qytetit.
Disa trupa të djegur ishin brenda një anijeje të djegur dhe të tjerë u gjetën aty pranë.
Gjysmëhëna e Kuqe nuk dha detaje mbi identitetin e viktimave apo shkakun e vdekjes së tyre, por aktivistët e të drejtave të njeriut thanë në mediat sociale se ata ishin emigrantë.
Mediat lokale raportuan se njerëzit në bordin e varkës, shumica e të cilëve afrikanë, u vranë të enjten mbrëma nga të shtënat me armë zjarri pas një përleshje mes trafikantëve.
Sipas të njëjtave burime, një nga grupet e trafikantëve të përfshirë në përleshje i ka vënë flakën sot anijes. Për momentin nuk ka qenë e mundur të konfirmohet ky informacion nga autoritetet.
Kaosi që pasoi rënien e regjimit të Muammar Gaddafit në vitin 2011 e ka bërë Libinë një rrugë të privilegjuar për dhjetëra mijëra emigrantë nga Afrika Sub-Sahariane, vendet arabe dhe Azia jugore që përpiqen të arrijnë në Evropë përmes bregdetit italian.
Këta emigrantë janë viktima të trafikantëve, kur këta njerëz fatkeq vdesin teksa tentojnë kalimin e rrezikshëm të Mesdheut, ndërkohë që OJQ-të denoncojnë rregullisht Libinë për keqtrajtime.
Që nga fillimi i vitit, 14,157 emigrantë janë arrestuar dhe janë kthyer në Libi, sipas një raporti nga Organizata Ndërkombëtare për Migracionin (IOM) të publikuar të hënën.
Të paktën 216 persona kanë vdekur duke tentuar kalimin dhe 724 janë të zhdukur dhe supozohen të vdekur, sipas IOM.
