Sherr në një lokal në Ndroq, xhaxha e nip arrestohen për plagosjen e një personi

Nga OraNews Përditësimi i fundit 21 Gusht 2022, 09:51

Një 38-vjeçar i identifikuar si Saimir Mansaku është arrestuar për plagosjen me sende të forta të shtetasit Përparim Troplini në një lokal në Ndroq.

I përfshirë në konflikt edhe xhaxhai i të arrestuarit, Halit Mansaku, i cili u vu në pranga pasi iu gjetën në banesë armë zjarri dhe municion luftarak.

Ndërkohë ëshë proceduar në gjendje të lirë pronari i lokalit Petrit Reka ku ndodhi konflikti, pasi dëmtoi vendngjarjen dhe nuk kallëzoi krimin.

"Shërbimet e Komisariatit të Policisë Nr. 6, pas marrjes së njoftimit për një konflikt në një lokal, në Ndroq, ku dy shtetas kishin goditur me sende të forta një shtetas tjetër, menjëherë kanë organizuar punën për kapjen e autorëve të dyshuar. Brenda një kohe rekord, falë veprimeve profesionale policore nga specialistët për Hetimin e Krimeve në Komisariatin e Policisë Nr. 6, janë shoqëruar në komisariat dhe janë arrestuar në flagrancë shtetasit: S. M., për veprën penale "Plagosja e rëndë me dashje"; H. M., për veprën penale "Mbajtja pa leje e armëve, armëve shpërthyese dhe i municioneve". Gjithashtu është proceduar penalisht në gjendje të lirë shtetasi P. R., pronari i lokalit ku ndodhi konflikti, për veprat penale "Moskallëzimi i krimit" dhe "Veprime që pengojnë zbulimin e së vërtetës" njoftoi policia.

Shtetasi Saimir Mansaku, së bashku me xhaxhain e tij, shtetasin Halit Mansaku, në një lokal në Ndroq, janë konfliktuar me shtetasin Përparim Troplini, i cili si pasojë e konfliktit është dëmtuar dhe ndodhet në spital, nën kujdesin e mjekëve.

Ndërsa pronari i lokalit, shtetasi Petrit Reka, ka dëmtuar vendngjarjen duke penguar zbulimin e së vërtetës, si dhe nuk ka kallëzuar krimin.

Në vijim të veprimeve, gjatë kontrollit që shërbimet e Policisë ushtruan në banesën e shtetasit Halit Mansakut, ku u gjetën dhe u sekuestruan një armë zjarri pushkë, 2 krehëra arme zjarri pistolete dhe sasi e konsiderueshme municioni luftarak.

Materialet i kaluan Prokurorisë, për veprime të mëtejshme procedurale.