“Porti i Durrësit aferë korruptive”, Vasili letër zyrtare qeverisë: Cili është qëndrimi i BE për këtë projekt?

Nga OraNews Përditësimi i fundit 12 Gusht 2022, 19:31

Deputeti Petrit Vasili i ka dërguar qeverisë letër zyrtare lidhur me aferën e Portit të Durrësit.

Vasili hedh akuza se qeveria në mënyrë të fshehtë dhe pa asnjë trasparencë po përpiqet të rrëmbejë, një aset strategjik të një rëndësie të jashtëzakonshme kombëtare si Porti i Durrësit.

Në letrën drejtuar qeverisë janë bërë disa pyetje lidhur me portin e Durrësit si dhe ka kërkuar që të vihet në dispozicion i gjithë komunikimi zyrtare me Bashkimin Europian për këtë projekt.

Lajmin për letrën zyrtare e bvëri të ditur Vasili përmes një postimi në rrjetin e tij social Facebook ku ndër të tjera shkruan se asnjë cm i Portit nuk do të lejohet kurrë të grabitet nga mafia qeveritare.

Postimi i plotë:

Letër zyrtare Qeverisë për aferën e Portit të Durrësit!

Qeveria në mënyrë të fshehtë dhe pa asnjë trasparencë po përpiqet të rrëmbejë, një aset strategjik të një rëndësie të jashtëzakonshme kombëtare si Porti i Durrësit.

Si Deputet i Kuvendit të Shqipërisë i jam drejtuar Qeverisë me kërkesë zyrtarë për informacion.

Asnjë cm i Portit nuk do të lejohet kurrë të grabitet nga mafia qeveritare.

Ja pyetjet drejtuar Qeverisë në kërkesën time zyrtare:

A është dhënë statusi i investitorit strategjik?

Nëse po, cilës kompanie i është dhënë ky status?

Jeni shprehur publikisht se investitori do të jetë “Emaar Group” ndërkohë në memorandumin e firmosur nuk përmendet gjëkundi “Emaar Group” ?

Analiza financiare si detyrim ligjor për marrjen e statusit të investitorit strategjik nga cila kompani është paraqitur?

A parashikohet, që ashtu sikurse në rastin e inceneratorëve prona publike të mund të lihet kolateral në Bankat Shqiptare apo të huaja në funksion të marrjes së kredive nga kompanitë e përfshira në memorandum?

Cilat janë masat garantuese që Porti i Durrësit të mos sekuestrohet nga Bankat vendase apo të huaja për shkak të problemeve eventuale të kompanive huamarrëse?

Investimi detyron spostimin e Portit Tregtar aktual, cilat janë masat e marra që Dogana të funksionojë normalisht dhe kjo të mos ndikojë negativisht në realizimin e të ardhurave që lidhen me biznesin ashtu dhe për Buxhetin e Shtetit?

Cila është kosto e Portit të ri tregtar dhe sa është kohëzgjatja e realizimit të ndërtimit të këtij porti?

Në këtë periudhë të ndërmjetme pra të fillimit të ndërtimit të portit turistik nga njëra anë dhe Portit tregtare nga ana tjetër, ku do jetë vendodhja e funksionimit të Doganës portuale Durrës?

Ndërtimi i Portit të ri tregtar do të realizohet me fonde të buxhetit apo do kërkohet një tjetër borxh?

Cili është qëndrimi zyrtar i institucioneve të Bashkimit Evropian për këtë projekt?

Kërkojmë nga ju të na vihet në dispozicion i gjithë komunikimi zyrtare me Bashkimin Europian për këtë projekt.