Policia tregon si ndodhi plagosja e inspektorit të IMT-së, shoqërohet autori së bashku me armë e krimit
Nga OraNews Përditësimi i fundit 12 Gusht 2022, 18:17
Policia e Tiranës ka dhënë informacion zyrtar lidhur me plagosjen me armë zjarri të inspektorit të IMT-së në Tiranë, Ilirjan Gavelli.
"Më datë 12.08.2022, rreth orës 17:30, në kryqëzimin e rrugës “Todi Shkurti” me rrugën “Kristaq Capo”, shtetasi Q. M., 55 vjeç, dyshohet se ka plagosur me armë zjarri, punonjësin e i IMT-së, shtetasin I. G., 52 vjeç, i cili sapo kishte përfunduar ekzekutimin e një vendimi" njofton policia.
52-vjeçari është dërguar në spital dhe ndodhet nën kujdesin e mjekëve.
Shërbimet e Komisariatit të Policisë Nr.1 kanë kapur dhe shoqëruar menjëherë autorin e dyshuar.
Policia ka sekuestruar armën e zjarrit pistoletë, e cila dyshohet se është përdorur gjatë kryerjes së krimit.
Grupi hetimor ndodhet në vendngjarje dhe po punon për sqarimin e rrethanave të ngjarjes.
