Papa mes të mbijetuarve indigjenë: I kërkoj Zotit falje për vuajtjet e vendasve në Kanada
Nga Amado Çela Përditësimi i fundit 25 Korrik 2022, 22:43
Kisha Katolike ka kërkuar falje për herë të parë për keqtrajtimet e mijëra fëmijëve të fiseve indigjenë në Kanada të cilët u shkolluan nëpër shkolla rezidenciale. Ati i Shenjtë bëri thirrje për një hetim të thelluar për ngjarjen e turpshme.
Mes lotëve të të pranishmëve, Papa Françesku u ka kërkuar falje të pranishmëve të mbijetuar nga keqtrajtimet e Kishës Katolike në shekullin e kaluar.
Ati i Shenjtë bëri thirrje për një hetim të detajuar për nder të të mbijetuarve të fiseve indigjenë në Kanada, të cilët ranë pre e abuzimeve nëpër shkollat e drejtuara nga Kisha Katolike Romake.
"Jam thellësisht i keqardhur, falja e tij është hapi i parë dhe se duhet të ndodhë një "hetim serioz" për abuzimet për të nxitur shërimin. Dhimbje, indinjim dhe turp për veprimet e shumë pjesëtarëve të Kishës Katholike Romake," tha ai.
Falja papale u prit me duartrokitje nga audienca e të mbijetuarve, disa prej të cilëve udhëtuan nga larg për të dëgjuar fjalimin e Papës.
Papa ndodhet në Kanada për të kërkuar falje për rolin e Kishës në shkollat që synojnë asimilimin e fëmijëve indigjenë.
Shkollat e financuara nga qeveria ishin pjesë e një politike që synonte të shkatërronte kulturat dhe gjuhët indigjene.
85-vjeçari i quajti sistemet e shkollave një gabim katastrofik dhe kërkoi falje për angazhimet djallëzore nga kaq shumë të krishterë kundër njerëzve indogjenë.
Kreu i Selisë së Shenjtë u tha të pranishmëve se kishte udhëtuar drejt Kanadasë me një palë këpucë të vogla që ia kishte dhuruar nga një delegacion indogjen në Vatikan vitet e shkuara.
Këpucët simbolizojnë fëmijët që ndiqnin shkollat rezidenciale dhe nuk erdhën kurrë në shtëpi.
Kisha Katolike Romake ka drejtuar rreth 70% të shkollave rezidenciale në Kanada nga vitet 1870 deri në 1996.
Gjatë kësaj periudhe rreth 150 000 fëmijë indigjenë u morën nga shtëpitë e tyre dhe u vendosën në këto shkolla.
Sipas një raporti historik të vitit 2015, të mbijetuarit folën publikisht se kishin qenë pre e abuzimeve, sëmundjeve dhe kequshqyerjes në këto shkolla.
Më shumë se 3 000 nxënës dyshohet se kanë vdekur dhe shumë raporte e kanë quajtur sistemin e shkollave rezidenciale një element të gjenocidit kulturor kundër popujve indigjenë të Kanadasë.
