Më pak grurë në Myzeqe, bujqit heqin dorë nga kultivimi për shkak të kostove të larta
Nga Inelda Vallja Përditësimi i fundit 16 Qershor 2022, 18:45
Për shkak të kostove të larta fermerët në Myzeqe kanë hequr dorë nga kultivimi i grurit. Ata thonë se e kanë të pamundur të përballojnë shtrenjtimin e plehrave kimike ndaj i bëjnë thirrje qeverisë për mbështetje.
Këtë vit në tokat e Myzeqesë ka më pak grurë.
"Kanë hequr dorë njerëzit nga gruri."
Kultivuesit në fshatrat e Grecallisë, Mujallisë dhe Daullasit në Fier thonë se nuk përballojnë dot çmimet e larta të plehrave dhe naftës.
"Nga 40 mijë lekë kuintali i dapit vajti 120 mijë lekë."
Madje këtë vit janë kursyer në përdorimin e tyre ndaj edhe prodhimi nuk ka qenë aq i mbarë.
"Nuk kishim lekë për ti hedhur një dorë pleh."
Shumica kanë mbjellë sa për të siguruar bukën e familjes.
"Leverdi ka ai që do të hajë bukë".
Ata që kanë mbjellë edhe për të shitur shpresojnë që të marrin lekët që kanë shpenzuar.
"Ta japësh me 25-27 si vitet e tjera nuk marrim as lekët tona."
Thonë se nga shteti nuk kanë përfituar asnjë ndihmë. Qeverisë i bëjnë thirrje që të kthejë sytë nga fshati.
"Duam ndihmë nga shteti për subvencionimet e plehrave dhe naftës."
"Ata nuk shikojnë nga ne fare."
E njëjta situatë është edhe në fshatrat e tjerë të Fierit aty ku fermerët po detyrohen të lënë tokat djerrë për shkak të kostove të larta që ka kultivimi i tyre dhe mungesës së politikave mbështetëse nga qeveria.
