Albin Kurti i rikthehet dialogut me Serbinë. Kosova propozime për komunat serbe
Nga Amado Çela Përditësimi i fundit 1 Qershor 2022, 10:38
Raportuesja për Kosovën në Parlamentin Evropian, Viola Fon Kramon tha se ka informata se Qeveria Kurti ka një propozim lidhur me zbatimin e marrëveshjes për Asociacionin e Komunave me Shumicë Serbe.
Cramon në një intervistë për mediet në Kosovë refuzoi të japë më shumë detaje, por sinjalizoi se Kabineti Kurti po rishikon qëndrimin për unifikimin e komunave me shumicë serbe, i cili pengon prej kohësh dialogun mes Prishtinës dhe Beogradit për gjetjen e një zgjidhjeje përfundimtare mes dy vendeve.
Ajo potencoi se përpara marrëveshjes finale, duhet të zbatohen marrëveshjet e mëhershme, ku përfshihet edhe marrëveshja për Asociacionin.
Për Cramon, ndryshimi i qëndrimit nga ana e Qeverisë së Kosovës është çështje e arritjes së kompromisve, duke shtuar se kundërshtimi i Asociacionit nga Kosova s’ka qenë gjë e mençur.
Komentet e deputetes gjermane, vijnë disa orë pasi presidenti serb Aleksandër Vuçiç tha se duhej një kompromis për çështjen e Kosovës dhe unifikimi i komunave serbe mund të ishte fillimi i gjetjes së një marrëveshjeje mes dy vendeve.
Themelimi i Asociacionit është shkruar në Marrëveshjen e Brukselit të vitit 2013, mes Kosovës dhe Serbisë. Dy vjet më vonë, të dyja palët janë pajtuar edhe për parimet për themelimin e tij.
Por Gjykata Kushtetuese me një vendim të vitit 2015 nxori në dukje se disa parime të asociacionit nuk janë në pajtim me Kushtetutën e vendit.
Asociacioni i komunave me shumicë serbe parashikohet që të mbledhë rreth vetes dhjetë komuna në Kosovë ku shumica e popullsisë janë serbë, përkatësisht në Mitrovicën e Veriut, Kllokot, Partesh, Ranillug, Graçanicë, Zveçan, Zubin Potok, Novobërdë, Leposaviç dhe Shtërpcë.
Siç parashikohet me marrëveshjet përkatëse, Asociacioni ka për qëllim të përfaqësojë interesat kolektive të atyre komunave, në fushën e arsimit, shëndetësisë, planifikimit urban dhe rural si dhe të ekonomisë.
