Mirditë, kapet me kallëpe me lëndë plasëse dhe bimë narkotike, prangoset një person
Nga OraNews Përditësimi i fundit 25 Maj 2022, 13:02
Policia e Mirditës ka finalizuar operacionin e koduar "Domgjoni" ku është goditur një rast i kultivimit të bimëve narkotike dhe një rast i mbajtjes së lëndëve shpërthyese.
Në këtë operacion është vënë në pranga 1 shtetas dhe janë sekuestruar kallëpe me lëndë plasëse dhe bimë narkotike të kultivuara.
“Në vijim të punës për parandalimin dhe goditjen e veprimtarisë kriminale në fushën e kultivimit të bimëve narkotike, si dhe të mbajtjes së municioneve luftarake e lëndëve shpërthyese, bazuar në informacione policore të administruara në rrugë operative për një shtetas që kishte kultivuar bimë narkotike në afërsi të banesës së tij, si dhe mbante lëndë plasëse shpërthyese, nga specialistët për Hetimin e Krimeve në Komisariatin e Policisë Mirditë është finalizuar operacioni policor i koduar "Domgjoni". Si rezultat i këtij operacioni është arrestuar në flagrancë shtetasi D. L., banues në fshatin Domgjon, Mirditë, për veprat penale "Kultivimi i bimëve narkotike" dhe "Mbajtja pa leje e armëve shpërthyese dhe municionit".” – njofton policia.
Arrestimi i shtetasit D. L. u bë pasi gjatë kontrollit të ushtruar në tokën në pronësi të tij, në afërsi të banesës, janë gjetur të kultivuara bimë të dyshuara narkotike cannabis sativa.
Gjatë kontrollit të ushtruar në një ambient tjetër në afërsi të banesës, shërbimet e Policisë kanë gjetur dhe sekuestruar 4 kallëpe me lëndë të dyshuar plasëse.
Materialet procedurale iu referuan Prokurorisë pranë Gjykatës së Rrethit Gjyqësor Lezhë, për veprime të mëtejshme.
